Ssaabasajja Kabaka Ronald Muwenda II asiimye n’akiikirirwa Nnaalinnya Lubuga Agnes Nabaloga, era yakwasizza ba nnantameggwa b’empaka z’Amasaza ezomulundi ogwe 19 ekikopo, ne cheque ya Bukadde bwa shs 12.
Goolo ya Bulemeezi eteebeddwa muyizzi tasubwa Ssenyonga Johnson, nga agiteebedde mu kitundu ky’omuzannyo eky’okubiri.
Katikkiro wa Buganda Charles Peter Mayiga yayambazizza aba Gomba emidaali olw’okukwata ekyokubiri, nabakwasa ne cheque ya bukadde bwa shs 9.
Minister w’abavubuka Ebyemizanyo n’Ebitone Owek Ssalongo Sserwanga Robert agambye nti Empaka zino zibadde nnyuvu ebitagambika, olwokwaagala abawagizi kweboolesezza, n’okuwagira ttiimu zabwe obutasalako.
Omwami wa Ssaabasajja atwala essaza Bulemezi Kangaawo Omulangira Ronald Mulondo, agambye nti atuuse ku kkula eritali lyabuliggyo.
Batabani ba Kitunzi e Gomba abakulembeddwaamu abatendesi okubadde Felix Kawooya ne Musoke Bashir ow’ebyekikugu ku tiimu ya Gomba, bakkirizza nti bawanguddwa, kyokka nebawera nti bakomawo omwaka ogujja n’amaanyi.
Mu mupiira ogwokulwanira ekifo ekyokusatu Mawokota ekkakkanye ku Buddu neegisinsimula goolo 3-0,era Mawokota neefuna cheque ya bukadde bwa shilling za Uganda 7 okuva mu centenary bank.
Isah Kimbugwe Batyayambadde ng’aweereza empaka z’amasaza ez’akamalirizo 2023 wakati wa Bulemeezi ne Gomba
Omuzannyi Allan Oyloth okuva mu tiimu y’Essaza Gomba yasinze okulabika obulungi mu kisaawe, Bagenda Abdul omukwasi wa goolo okuva e Bulemeezi yasinze bakwasi banne bonna, songa tiimu ye Kabula yesinze okwolesa empisa.
Empaka z’Omupiira gw’amasaza ga Buganda 2023 ziwagiddwa Airtel Uganda, CBS FM ,UNAIDS, Uganda Aids Commission, Centenary Bank,Plascon, Majestic Brands BBS Terefayina n’abalala.
Goolo ya Bulemeezi eteebeddwa muyizzi tasubwa Ssenyonga Johnson, nga agiteebedde mu kitundu ky’omuzannyo eky’okubiri.
