Akakiiko akaaweebwa omulimu gw’okwetegereza n’okwekenneenya enkola y’emirimu mu masaza ga Buganda gonna e 18, kawaddeyo alipoota omuli byebaazudde eri minister wa government ez’ebitundu mu Bwakabaka Owek Joseph Kawuki.
Omukolo gw’okuwaayo alipoota eno gubadde mu Bulange e Mengo.
Ssentebe w’akakiiko kano Omuk. Godfrey Male Busuulwa agambye nti amazasa gonna bagatalaaze era basanzeeyo enkyakakyuka nnene ddala mu mpeereza y’abaami b’amasaza n’amagombolola.
Busuulwa agambye nti obumu bweyongedde nnyo mu masaza, eggombolola, emiruka n’ebyalo bya Ssaabasajja byonna ekyoleka nti Buganda egenda mu maaso era ekkubo ery’okugituusa ku ntikko lyerufu.
Agambye nti abaami b’amasaza bongedde amaanyi mu nkola zaabwe, newankubadde waliwo abakyalinamu okusoomoozebwa okutonotono.
Minister wa government ez’ebitundu, okulambula kwa Kabaka era avunaanyizibwa ku bantu ba Buganda abali ebweru wa Buganda Owek. Joseph Kawuki, yeebazizza.olukiiko olw’okukola obutaweera nebatuukiriza ekkatala eryabaweebwa.
Mu ngeri yeemu yeebazizza n’abaami b’amasaza, abamagombolola wamu n’abaseesa abakolaganye obulungi n’olukiiko nekibasobozesa okukola omulimu omulungi.
Obubonero n’ebivudde mu kunoonyereza omuli n’okulangirira Essaza eppanguzi byakulangirirwa Katikkiro wa Buganda essaawa yonna.
Essaza erinaaba linywedde mu malala akendo lyerinaategeka olunaku lwa government ez’ebitundu ne Bulungibwansi.
Ssaabasajja Kabaka yasiima okulambulanga essaza eriba likize ku gannaago mu mpeereza, era asiima n’alabikako eri Obuganda ku lunaku lwa government ez’ebitundu ne Bulungibwansi (Ameefuga ga Buganda) olukuzibwa buli nga 8 Mukulukusabitungotungo (October) buli mwaka.
Owek. Kawuki ajjukizza abaami ba Kabaka ku kiragiro kya Ssaabasajja kyeyawa bweyali aggulawo Olukiiko lwa Buganda olwa 31, ekyokusitula omutindo gw’empeereza y’emirimu n’okubeera eky’okulabirako naddala eri abavubuka.
Asabye abakyetaaga okubaako byebatereeza, beetunulemu batereeze awakyali emiwaatwa mu buweereza bwabwe.
Minisitule ya government ez’ebitundu mu mwaka guno 2023 ebadde etambulira ku mulamwa, “Weekebere, Yimirira Osimbule buto”
Omwaka ogwayita 2022, essaza Kyaggwe lyeryanywa mu gannaago akendo, era Ssaabasajja yasiima baweebwe kavu w’ensimbi n’ebirabo ebigenderako ebyabakwasibwa Katikkiro Charles Peter Mayiga.
Olukiiko olulambula emirimu gy’amasaza lukulemberwa Omuk. Godfrey Male Busuulwa amyukibwa Damscus Ssali.
Bammemba ye; Haris Lubega, kkaminsona mu minisitule ya government ez’ebitundu, Jjingo Shaban, Mukwaya Lawrence, Nabukenya Christine, Kasirye Denis, Kyeyune Kitikyamuwogo, Ssaabwe Moses, Katongole Muntumukulu, Nakanjakko Annet, Nakanjakko Alexa, Namugwanya Sarah, Ssennabulya Robert ne Hajji Bossa.
Bisakiddwa: Kamulegeya Achileo K
