Obwakabaka bwa Buganda bufunye computer ekika kya Tablet eziwera 1000 okuva mu kitongole kya government ekivunaanyizibwa ku kubala abantu ki Uganda Bureau of Statistics (UBOS), okuyambako ekitongole okunoonyereza ku bibalo ebyenjawulo, naddala okutuuka mu bitundu gyekitasobola kutuuka.
Minister w’amawulire n’Okukunga Abantu era Omwogezi w’Obwakabaka Owek. Israel Kazibwe Kitooke y’akwasiddwa ebyuma bino ku lw’Obwakabaka, ku mukolo ogubadde ku kitebe kya UBOS mu Kampala.
Owek.Kitooke agambye nti computer zino zakuyaamba nnyo Obwakabaka okulaba nti ebibalo ebikuŋŋanyizibwa biteekebwateebwa mu bwangu ate n’okuwa abavubuka emirimu.
Ebyuma bino biwereddwa n’obukulembeze bw’ennono obulala okubadde; Obukama bwa Bunyoro, Obusiinga bwa Rwenzururu, ne University ez’enjawulo nga Makerere, Kyambogo, Busitema n’endala ziyambeko mu kunoonyereza n’okubangula abayizi abasoma ebibalo.
Obukama bwa Bunyoro buweereddwa tablets 550, Obusinga bwa Rwenzululu buweereddwa 120.
Makerere University eweereddwa Tablets 700, MUBS 250, Kyambogo University 350, Lira University 200, Mbarara University 350, Busitema 200, Gulu university 200, Kabale university 200.
Ssenkulu wa Uganda Bureau of Statistics, Dr. Chris Mukiza ategezeZza nti ebyuma bino babigabye okwanguya ku mulimu gw’okukuŋŋanya ebikwata ku bintu ebyenjawulo, , era asabye abantu bettanire emitmbagano okumanya ebibalo ebyenjawulo ebifulumizibwa ekitongole ky’akulembera n’aweetaga okuwabula mu nkola y’emirimu babawabule basobole okulongoosa.
Bisakiddwa: Ssekajjiijja Augustine
