Ssaabasajja Kabaka wa Buganda Ronald Muwenda Mutebi ii alagidde abantube mu Buwarabu Okwongera okunyweeza Obumu, Okumanya ebibasomooza n’Okubikolerako mu mukwano ogutaliimu Bukuusa.
Mu bubaka Ssaabasajja Kabaka bwaatisse Katikkiro wa Buganda Charles Peter Mayiga mu kuggulawo olukuηaana lwa Buganda Bumu Arab and Asian Convention 2025 mu Dubai, Empologoma egambye nti Abantu ba Buganda tebalina Kintu kyonna kisaanye kubaawula.
Ssaabasajja mungeri yeemu ajjukizza Abantube nti Ensi Buganda nungi ebitagambika, era naawa abantu amagezi babeeko byebakoppa ku Mawanga gyebali babizze mu Buganda ne Uganda yonna, era akubirizza abantu ba Buganda mu Mawanga gonna obutakkiriza kwawulwayawulwaamu bannakigwaanyizi.
Minister wa government ez’ebitundu era nga yavunaanyizibwa ku Bantu ba Kabaka abawangaalira ebweru wa Buganda Owek Joseph Kawuki, yebazizza abakulembeze ku mitendera egyenjawulo mu Kyondo kya Buwarabu abaliko kyebakoze era naasaba abantu ba Kabaka obutakkiririza mu bannakigwanyizi.
Omubaka wa Ssaabasajja atwala ekyobdo kya Buwarabu Owek Abasi Nsubuga, yebazizza Ssaabasajja Kabaka olw’Okusiima naamuwa Obuvunaanyizibwa ,era yeeyamye okuweereza nga tamutiiriridde.
Omukolo guno gubadde ku Sheraton hotel Creek mu Dubai,era gwetabiddwaako abebitiibwa abenjawulo, Abataka, Abaami ba Kabaka ku mitendera egyenjawulo n’Abakungu abalala bangi.#
Bisakiddwa: Kato Denis
