Ssaabasajja Kabaka Ronald Muwenda Mutebi II asiimye abaweereza mu bitongole by’Obwakabaka bonna olw’Obujjumbize mu nkola y’emirimu gyabwe, nga kino kitundu ku nkulaakulana y’Obwakabaka.
Mu bubakabwe bwatisse Omulangira David Kintu Wassajja mu kuyimba ennyimba z’Amazaalibwa ga Yesu Kristo ag’Omwaka 2023 mu Bulange e Mengo, Beene agambye nti abadde agoberera emirimu gyonna egikolebwa abaweereza abenjawulo, ng’ebivaamu biraga essuubi eritwala Buganda ku Ntikko.
Ssaabasajja mu ngeri yeemu alagidde abakozi mu bitongole okugenda mu maaso n’okunnyonnyola abantu byonna ebikolebwa mu Bwakabaka , bongere okumanya ebirungi ebikolebwa.
Omuteregga afundikidde alagira abaweerezaabe bonna okweyisa Obulungi mu luwummula luno, kyokka nabakuutira obutakoowa kukozesa maanyi mu byebakola.
Ennyimba z’amazaalibwa n’amazina bikulembeddwamu Choir egatta ebitongole by’Obwakabaka, ne choir ez’enjawulo okuva ku kanisa za pentecost.
Omutume Joseph Sserwadda owa Victory Church mu Ndeeba yakulembeddemu okusaba okwenjawulo, yeebazizza Ssaabasajja Kabaka olwokwagala ennyo Omukama Katonda, n’Okukubiriza abantube okukola obutaweera.
Katikkiro wa Buganda Charles Peter Mayiga ategeezezza nti omwaka guno gubadde gwa bibala nnyo eri Obwakabaka bwa Buganda, olwabantu ba Beene okwongera okunyweeza ebiragirobye.
Katikkiro mu ngeri eyenjawulo yeebazizza olukiiko oluteeseteese ennyimba z’amazaalibwa okululembeddwamu ssenkulu wa Buganda Land Board Omuk Simon Kaboggoza, era nalangirira Terefayina y’Obwakabaka BBS nti yegenda okutegeka ennyimba z’amazaalibwa Omwaka 2024, n’okusaba okulikulemberwamu ekanisa ya Uganda ebuna wonna.
Ekitongole ki Lubiri Nnaabagereka primary school kyekisinze mu bitongole byonna mu Bwakabaka enkola y’emirimu ey’omutindo n’Obubonero 89.87% era nekwasibwa Engabo ne Sseddume w’Ente, K2 Telecom kyakaubiri n’Obubonero 87.83% , ate CBS Radio nekwata kya kusatu n’Obubonero 86.3%.
Haji Abu Kawenja yaanywedde akendo mu baweereza ku Radio ya Ssaabasajja CBS, mu administration Ronald Matovu, mu BBS Terefayina Evelyn Ndagire, Weerinde Insurance Florence Mulwanyi, Buganda Land Board Emmanuel Ssembatya, K2 Telecom Betty Nabbanja, Nabagereka Development Foundation n’ebitongole ebirala byonna byalonze abakozi abaakize ku banaabwe.
Bakwasiddwa ejjinja erisiddwako omukono gwa Ssaabasajja Kabaka, era nga balina n’ettu ly’ensimbi eribaweebwa ebitongole byebakoleramu.
Oluvannyuma Omulangira David Kintu Wassajja akoleezezza Omuti gwa ssekukkulu, nga akabonero ak’Okwaagaliza abaweereza amazaalibwa g’Omutonzi Amalungi, era naasala ne Keeci.
Abaweereza b’Obwakabaka baakudda ku mirimu nga 3.Jan.2024, okuddamu okukakkalabya.
Omukolo guno gwetabiddwaako ba Nnaalinnya, abalangira n’Abambejja, Katikkiro eyawummula Owek Dan Muliika, Ba jjajja abataka abakulu b’Obusolya, Ssaabaganzi Ssalongo Emmanuel Ssekitooleko,ba minister ba Ssaabasajja , ababaka mu paliment , ba ssenkulu b’ebitongole, abaami b’amasaza n’abantu kinoomu
Bisakiddwa: Kato Denis
