Ekanisa ya Uganda ekakasizza nti yafunye obwannanyini ku ttaka okwaziikibwa eyali Ssaabalabirizi wa Uganda Jakaaliya Janaan Luwum e Muchuni mu district ye Kitgum.
Rev. Can. Aaron Mwesigye, director mu ministry y’empisa n’obutebenkevu mu kanisa ya Uganda, agamba nti ettaka okwaziikibwa Ssaabalabirizi Janaan e Muchuni lyali ly’abantu bonna ab’ekitundu, wabula kati baaliwaayo eri ekkanisa ya Uganda likulaakulanyizibwe.
Ren.Mwesigye agamba nti Janaan Luwum atutumudde Uganda era ensonga ez’okutumbula olunaku luno teziri ku Uganda yokka wabula munsi yonna.
Janaan Luwum ye Ssaabalabirizi omuddugavu eyasooka eyali atwali ekitundu omwali Uganda, Rwanda, Burundi,Kenya,Tanzania ne Bboga Zaire eyafuuka Democratic Republic of Congo.
Janaan Luwum yazaalibwa mu 1922 mu bendobendo lya Acholi era nga ye Ssaabalabirizi omuddugavu eyasooka era nga yeyasooka okufiira mu ntebe ng’akola emirimu gy’obuweereza.
Ssaabalabirizi Janan Jakaliya Luwumu yattibwa government ya president Idd Amin Dadda mu 1977, nga yali avunaanibwa olw’okwolesa obuvumu mu kulwanirira eddembe lyobuntu, okunywerera ku mazima n’okulwanirira omuntu waabulijjo.
Waali wakayita ennaku mbale nga government ekakasizza nti yali emukutte anoonyerezebweko ku bigambibwa nti yali agisekeeterera, wabula ate ebyaddirira government yeemu neemubika nti yali afiiridde mu kabenje.
Ekkanisa ya Uganda ng’ekuza olunaku luno, egamba nti okwogeraganya n’obumu, ly’ekkubo erisaanidde okukwatibwa, mu kiruubirirwa ekyokutebenkeza emirembe, oluvanyuma ly’akalulu ka 2026.
Ssaabalabirizi w’ekkanisa ya Uganda, The Most Rev. Dr. Samuel Steven Kazimba Mugalu ng’asinziirira mu bitundu bye Mucwiini, agambye nti banna Uganda basaanidde okufuga obusungu.
Janan Luwum yafuulibwa omuzira wa Uganda n’ensi yonna olw’okulwanirira eddiini, era yaweebwa olunaku olw’enjawulo okumujjukira, olukwatibwa buli nga 16 February, era luba lwakuwummula.
Bisakiddwa: Ddungu Davis
