Olwa leero 26 January,2026 giweze emyaka 40 beddu, bukyanga ggye lya National Resistance Army liwamba obuyiinza bw’okukulembera Uganda oluvannyuma lw’olutalo olwamala emyaka 5, kati eryeyubula nerivaamu ekibiina ki National Resistance Movement.
Mu myaka gino 40 olunaku luno olwakazibwako Olw’ameenunula okuva mu government ezaaliko, lukuzibwa buli mwaka okujjukira abantu abaakulemberamu olutalo luno, abaafirwa ebyabwe n’abantu babwe mu lutalo, saako n’okujaguza ebituukiddwako.
Emikolo emikulu egy’omwaka guno giyindira mu kisaawe e Kololo.
Nga NRM ejaguza emyaka gino 40, yenyumiriza mu kuleeta emirembe n’okunyweza ebyokwerinda by’eggwanga, okutumbula ebyenfuna ng’eyita mu nteekateeka y’Emyooga, Parish Development Model n’ebirala.
Minister we ensonga zobwa President Milly Babalanda agambye nti waliwo abantu 33 abagenda okusiimibwa n’okuweebwa emidaali egyatuumibwa Nalubaale, n’emirala, olw’ebyo byebakoledde e ggwanga ate nga birabwako, era ng’emidaali gino baatandika okugigabirako n’ensimbi enkalu.
Abamu ku baalwana ku lutalo olwaleeta NRM mu buyiinza, bawabudde omukulembeze w’eggwanga Yoweri Kaguta Museveni Tibuhaburwa era nga yabadde mu ntebe okuva lw’ebakwata obuyiinza, nti okuddamu yetegereza ensonga zebaalambika nga balwaana okukwata obuyinza.
Yoweri Kaguta Museveni mu 1981 yeyakulemberemu ekibinja ky’abayeekera ekya NRA nebalwana olutalo lw’ekiyeekera okutuusa bwebawamba obuyinza nga 26 January, 1986 natandika okukulembera Uganda n’okutuusa kati lweyalondeddwa ku kisanja ekyo 7.
Hajji Abdul Nadduli omu kubaalwana olutalo lw’ekiyeekera, awabudde abakulu okusooka okuddamu okutuula betegereze ensonga zebaasimbako essira nga banoonya obuyinza , nga kino kyakubayamba okwekubamu tooki okutereeza ebisobye mu myaka gino 40.
Hajji Nadduli agambye nti kikyamu NRM amaanyi okugamalira mu kalulu, ate netafaayo kutereeza ebisobu ebigenda nga binafuya bannansi.
Agambye nti kye kiseera abakwatibwako ensonga mu NRM batuule bekubemu ttooci mu bulambulukufu, bakole ku bintu ezikosa abantu ba babulijjo, mu kifo ky’okwemalira mu kukola ebintu ebigasa abantu ab’olubatu ate abakulu mu government abalina era abasobola okwetusaako buli kimu.
Wabula Amyuka Ssaabawandiisi wa NRM Rose Namayanja Nsereko ategezezza nti mu bingi ebituukiddwa mu myaka egiyise, naddala mu kitundu ekya Luweero olutalo gyerwasiimba amakanda, mulimu okuzimba Amakolero agawadde abantu emirimu.
Agambye mu birala ebikoleddwa era ebyenyumirizibwamu kwekusitula ebyenfuna by’eggwanga, okunyweza ebyokwerinda n’ebirala, era nategeeza nti waliwo n’enteekateeka endala nnyingi zebasuubira okukolako okukulaakulanya eggwanga.#
