Oludda oluwabula government mu parliament lufulumizza embalirira y’omwaka gw’ebyensimbi ogujja ogwa 2026/2027, gye basuubira nti government eri mu buyinza gyeyandigoberedde okutuusa ku bannauganda obuweereza obusaanidde.
Embalirira ekoleddwa oludda oluvugabya ya shs trillion 71.4, ate eyakoleddwa government ya trillion 84.
Ab’oludda oluvuganya bagamba nti embalirira gyebakoze esobola okuyamba eggwanga Uganda okuwewukako okuva mu mabanja getamburiramu entakera.
Bagamba nti singa government ekendeeza okwewola okuva ku trillion 8.9, wakiri neyewolanga trillion 5.1, era ensimbi ezo nezikozesebwa bulungi nga tezibulankanyiziddwa, bannayugana basobola bulungi okufuna obuweereza obulungi.
Bino byonna bitemaatemeddwa akulira oludda oluwabula government mu parliament Joel Ssenyonyi.
Embalirira esomeddwa ku mukolo gwebategekedde ku parliament.
Ssenyonyi agamba government yandisosowazizza okuddaabiriza enguudo eziri mu mbeera embi, mu kifo kyokukola enguudo empya, Okutumbula amasomero agaliwo mukifo kyokutandika amapya, okusasula obulungi abasawo n’ebirala.
Mungeri yeemu Ssenyonyi anenyezza government okwetuumako amabanja entakera ngate emisolo bagirinnyisa buli kiseera .
Ababaka ba parliament ku ludda oluwabula government ababadde mu parliament eye 11 n’eddako eye 12 okuli owe bbaale county Charles Tebandeke, owa Lubaga North Abubakar Kawalya, nowa Bukooli North Ayagalachi Jamali, bewunyizza engeri government gyekolamu ebintu byayo nebatuuka n’okupaaluusa embalirira, ng’ate bannauganda bakyayavula mu byenfuna ekintu ekibaviirako okubabinikako emisolo egitagambika.#
Bisakiddwa: Nabagereka Edith
