Kooti ensukkulumu egobye okusaba kwa munnauganda Patrick Mukisa, eyali yaddukira mu kooti ng’ayagala eyimirize okulonda kw’abakulembeze mu ggwanga okugenda okubaawo ku Thursday nga 15 January,2026.
Patrick Mukisa yawawabira Ssaabawolereza wa government, akakiiko k’ebyokulonda, ne president Yoweri Kaguta Museveni.
Mukisa Patrick agamba nti kikyamu akakiiko k’ebyokulonda okutegeka okulonda okulala, nga tewali nkyukakyuka zikoleddwa mu kulonda omukulmebeze w’eggwanga, nga kooti bweyalambika mu 2016.
Eyavuganyaako ku bwa president mu kalulu ka 2016, John Patrick Amama Mbabazi yagenda mu kooti nga yemulugunya ku ngeri okulonda wa president gyekwali kutabuddemu, era kooti netegeeza nti mwalimu obumulumulu obwali bwetaaga okuterezaamu, wabula nga bwali tebusobola kusazisaamu byali bivudde mu kulonda.
Kooti yategeeza nti enteekateeka y’okulonda president yali yetaaga okukolebwamu ennongoosereza, era neragira Ssaabawolereza wa government okugoberera enteekateeka eyo era ategeeze kooti.
Wabula okuva olwo ebisanja bibiri biyiseewo, tewali nnoongoosereza zaakoleddwa.
Wano Patrick Mukasa weyasinzidde okusaba kooti ensukkulumu eyimirize okulonda kwa bonna okwa 2026, okutuusa ng’ennoongosereza zikoleddwa.
Kooti ensukkulumu etegeezezza nti siyerina obuyinza okuwuliriza omusango ogw’engeri eyo ogukwata kukulonda okutannabeerawo, wabula yo ewuliriza misango gikwata kukulonda nga kuwedde, okuva eri ababeera bavuganya ku bwa president singa wabeerawo alina okwemulugunya kwonna.
Bisakiddwa: Betty Zziwa
