Abantu 2 bafiiriddewo mbulaga n’abalala abasoba mu 10 nebamenyekanenyeka mu kabenje akagudde e Nabusanke Kayabwe ku luguudo oluva e Kampala okudda e Masaka.
Akabenje kano kabaddeme Emmotoka 4, okuli lukululana esaabaza amafuta No.UBL 274Q, Taxi No.UAP 556Z , ne Prado No. UBJ 481G ne Pickup TownAce UBR 242C ebaddeko watermelon n’abantu 2, bano bebafiiriddewo.
Akabenje kaguddewo ku ssaawa ng’emu ey’akawungeezi ku Thursday nga 18 December,2025.
Aberabiddeko ng’akabenje kagwawo abakulembeddwamu Mwogezi Steven, defence w’ekyalo Kikomazi Nabusanke, bagambye nti lukulunana y’amafuta yesoose ebadde eva e Masaka ng’edda ku ludda lw’e Kampala, yesoose okutomera Prado emabega, nga nayo ebadde eva Masaka ng’rdda Kampala.
Bwezeetomedde olwo neziyingirira Taxi ne Pickup ezibadde ziva ku ludda lw’eKampala nga zidda ku lwe Masaka.
Kabadde kaseera kazibu ddala, ababadde mu taxi babatemyemu butemi, ate pickup emenyeseemu 2 era yebaddeko abafiiriddewo.
Abakoseddwa baddusiddwa mu ddwaliro e Nkozi nga bali mu mbeera mbi.#
Bisakiddwa: Sserugo Patrick
