Jajja w’obuyisiraamu Omulangila Dr. Kasim Nakibinge Kakungula accoomeddde ekitongole ekivunaanyizibwa ku kukuuma obutonde bwensi NEMA, olw’okukozesa obukambwe obusukkiridde nga kimenya ennyumba z’abantu mu bitundu bya Lubigi Nansana mu District ye Wakiso.
Omulangila Nakibinge abadde mu maka ge e Kibuli oluvanyuma lw’okusaala eswala ya Eid, n’agamba nti banna Uganda bawagira omulimu ogukolebwa NEMA okutaasa obutonde bwensi , wabula wasanye okubaawo obwenkanya nga bakola omulimu guno.
Agambye nti kyewunyisa okulaba ng’ekitongole kye kimu kitaliza amakolero n’amasundiro g’amafuta agaazimbibwa mu kitundu kye kimu ekyentobazi agafulumya kacicca ow’enjawulo, kyokka nekisenda ennyumba z’abantu abasula obusuzi.
Agambye nti embeera eno ereetawo obutali bwenkanya mu nkwata y’abantu.
Mumbeera yeemu Omulangila Dr. Kasim Nakibinge asabye ekitongole ki NEMA okwerula empenda zonna awayita entobazi abantu bonna bazimanye bulungi, n’okuwa abantu obudde abalina ebyabwe mu bifo bino okubyamuka.
Omulangila Nakibinge alabudde ku bumenyi bw’amateeka obukudde ejjembe mu Kampala bwagamba nti butadde abantu ku bunkenke , n’asaba Ssaabapolice Abbas Byakagaba okukola ekisoboka okumalawo embeera eno.
Supreme Mufti Sheikh Muhamad Shaban Galabuzi mu bubaka bwattise omumyukawe Sheik Mahad Kakooza yenyamidde olw’enguzi emaamiidde Uganda , nti ng’etuuse n’okulemesa emirimu okutambula olw’abantu ssekinoomu okwezibika ensimbi z’omuwi w’omusolo.
Omumyuka asooka owa Katikkiro Al Hajji Proffessor Twaha Kaweese Kigongo naye asabye abakulembeze ku mitendera egyenjawulo okukomya okwefuulira banaabwe, ku bintu ebyenjawulo byebabeera basazeewo.
Okusaala Eid Kuno kwetabiddwako Loodi Meeya wa Kampala Saalongo Elias Lukwago , Minister wa Buganda ow’ebyobulimi n’obulunzi Owek. Hajji Amis Kakomo , omumyuka w’omukubiriza w’olukiiko lwa Buganda Owek.Ahmed Lwasa n’abalala
Bisakiddwa: Ssebuliba Julius
