Olukiiko oluddukanya emizannyo gy’amasomero ga senior olwa Uganda Secondary Schools Sports Association, lumaliriza omulimu ogw’okulambula ebisaawe ebigenda okukozesebwa okutegeka empaka za Fresh Dairy Secondary Schools Games ezigenda okubeerawo okuva nga 26 okutuuka nga 05 May,2024.
Empaka zino zigenda kuzannyibwa ku ssomero lya Ndejje SS ewagenda okubeera omuzannyo gwa Hockey, ssetendekero wa Ndejje University ewagenda okubeera emizannyo okuli omupiira gw’abawala, Rugby, Badminton, Table Tennis ne Tennis ate omuzannyo gwa Basketball gugenda kubeera ku ssomero lya Janaan SS e Bombo.
Omulimu gw’okulambula ebisaawe bino gukulembeddwamu omumyuka wa Ssentebe asooka Hajji Kiteezaala Twahil, era ono akakasizza nti ebisaawe biri mu mbeera nnungi ddala.
Basuubira abayizi 4000 abagenda okuvuganya mu mizannyo gino.
Empaka z’omupiira ogw’ebigere ogw’abalenze zigenda kuzannyibwa ku ssomero lya Masaka SS era amasomero 60 gegagenda okuvuganya mu mpaka zino.
Emizannyo gya Fresh Dairy egyasembayo mu 2023 gyali ku ssomero lya Ntare SS e Mbarara, ate empaka za balenzi zaali ku somero lya Nyakasura SS e Fort Portal.
Obululu bw’empaka zonna bugenda kukwatibwa nga 24 April,2024 okusengeka ttiimu zino mu bibinja.
Bisakiddwa: Isah Kimbugwe
