Katikkiro wa Buganda Charles Peter Mayiga agambye nti kaweefube w’okukubiriza abantu okulima emmwanyi ate mu bungi okuyita mu nkola ya Mmwanyi Terimba siwakuyimirira, era naakubiriza ne bannauganda abalala bonna abalima emmwanyi obutaggwamu ssuubi, wadde nga government efunvubidde ku nteekateeka y’okuggyawo ekitongole kya Uganda Coffee Development Authority (UCDA) ekibadde kikoze ekinene okusitula omutindo gw’emmwanyi mu Uganda.
Government eyagala ekitongole kino kiggyibwewo okuyita mu bbago ly’etteeka eryayanjuliddwa mu parliament ababaka abasinga obungi nebawagira nti ebbago liddemu lyanjulwe omulundi ogw’okubiri, wadde nga mukusooka lyali lyagobwa nti lyakuttattana omutindo gw’emmwanyi mu Uganda ogubadde gweyongera okulinnya okuva mu 2017.
Mu kuyisa entegeka eno mu parliament eyakubiriziddwa sipiika Anitah Annet Among, waabaddewo okuwanvuya ku maloboozi okuva mu babaka abamu nga bawakanyaa okuggyawo ekitongole, era mu mbeera eno Sipiika mweyayogeredde ebigambo ebyakwatiddwa mu katambi nebitaputibwa mu ngeri ezitali zimu nga tebyabadde biwoomu, n’ebisiikuula emmeeme z’abantu naddala Abaganda era nga bebasinga n’okulima emmwanyi mu bungi.
Government eyagala emirimu gy’ekitongole UCDA kino kizzibwe mu bujjuvu mu ministry y’eby’obulimi n’obulunzi.
Wabula Katikkiro wa Buganda Charles Peter Mayiga agambye nti Obwakabaka bwa Buganda buzze buwabula enfunda eziwera obutaggyawo UCDA, olw’omulimu ekitongole gwe kikola okutumbula n’okulondoola omutindo gw’emmwanyi, eziyimirizzaawo amaka agasukka mu bukadde 2.
“Nkubiriza Abaganda ne (Bannauganda abalala bonna) okugenda mu maaso n’okulima emmwanyi: Kubanga embeera z’obulamu bw’abantu kikulu nnyo okusinga ebigendererwa bya bannabyafuzi ab’ensangi zino” – Katikkiro Mayiga
Katikkiro agambye nti Okuggyawo UCDA, kibonerezo eri Abaganda abalima emmwanyi ezitundibwa ebweru w’eggwanga eziwera kumpi ebitundu 50%.
Yennyamidde olwa bannabyabufuzi abalina ebigendererwa ebikusike abakola buli ekisoboka okuggyawo ekitongole ki UCDA, era nga bakirabanga obuwanguzi gyebali nga bagenderera okunafuya ebyenfuna mu Buganda.
Katikkiro agambye nti Kaweefube wa Emmwanyi Terimba wakugenda mu maaso.
