Ssaabasajja Kabaka Ronald Muwenda Mutebi II, ayozaayozezza, Tieng Adolah, omukulembeze w’Ennono ow’Abajapadola Moses Stephen Owor, olw’okutuuka ku kkula ly’Amazaalibwa g’Emyaka 100 beddu.
Nnyininsi Sseggwanga Musota asiimye naamuweereza Obubaka Obwa kiri mu Ttu, n’Ekifaananyi amakula eky’Omujaguza kennyini.
Kalemakansingyo yebazizza Kwar Adhola Stephen Owor olw’okunyweza enkolagana ennungi n’Obwakabaka bwa Buganda, n’ategeeza nti awali obumu enkulaakulana ebaawo
Kwar Adolah Moses Stephen Owor, yebazizza Ssaabasajja Kabaka Ronald Muwenda Mutebi II, olw’Omukwano gwamulaze entakera, kyokka mungeri eyenjawulo neyeebaza Beene olw’okukwasizaako Abantube okukulaakulana.
Katikkiro Charles Peter Mayiga, nga yaakulembeddemu abagenyi ba Kwar Adolah okuva mu Bwakabaka bwa Buganda, yebazizza Kwar Adolah olw’enkolagana ennungi ne Buganda, eyambyeko mu kutumbula Obumu.
Katikkiro akikkaatirizza nti enkolagana wakati w’Abaganda n’Abajapadhola esaanye eyongere okubeera entabiro y’Enkulaakulana n’Okwagalana.
Omubaka wa Tororo municipality, Yeri Apollo Ofwono era nga ye mukulu w’Ekika kya Ggembe, asabye abantu ba Tieng Adolah okukoppa Buganda bongere amaanyi mu Kulima Emmwanyi bekulaakulanye.
Katikkiro ku lugendo luno awerekeddwako Katikkiro eyawummula Owek. Ambassador Emmanuel Ssendawula, minister wa gavumenti ez’ebitundu era nga yavunaanyizibwa ku kulambula kwa Kabaka n’Abantu beebweeru wa Buganda Owek. Joseph Kawuki, minister wa cabinet, Olukiiko n’ensonga ez’Enkizo mu yafeesi ya Katikkiro Owek. Noah Kiyimba, Omubaka wa Ssabasajja akiikirira ebitundu bye Busia, Tororo ne Malaba Owek. Joseph Ssenkumba n’Olukiiko lwe.
Bisakiddwa: Kato Denis
