Ssaabasajja Kabaka Ronald Muwenda Mutebi II asiimye emirimu amatendo egikoleddwa abadde omuwerezaawe Ambassador William Bill Matovu Kaboga, naddala mu kaweefube w’okusitula embeera z’ebyobulamu.
Mu bubaka Kalalankoma bwatisse Katikkiro wa Buganda mu kusaba okwokweebaza Katonda olw’ebirungi byakozesezza Amb. William Matovu mu Lutikko e Namirembe, Ssaabasajja atenderezza Omugenzi olw’Ebirungi enfaafa byakoledde Obwakabaka , abadde muluηamya, Munnabyafaayo ate omuwabuzi alese Omukululo.
Katikkiro ku lulwe alambuludde ku buweereza bw’Omugenzi obubadde obwenjawulo , ate nga bwankizo.
Ambassador Charles Ssentongo nga yaayogedde ku lwa ministry y’Ensonga zomunda mu ggwanga, Omugenzi amebazizza olw’Obwerufu bweyakozesa mu kiseera kyeyaweererezaamu government ya wakati mu Mawanga agenjawulo,Okuli China ne Bungereza.
Omuk. Eddy Kaggwa Ndagala ku lwa Kabaka Foundation ayogedde ku mugenzi nga Omuntu oweekisa ,omuwi w’amagezi ate ayagaliza abalala, amaze ekiseera kyonna nga awagira emirimu gya Kabaka.
Ow’Omutuba gwa Kajabaja Omugenzi mwasibuka Timothy Muwonge, omugenzi amwogeddeko ng’omuntu abadde ow’ebyafaayo mu Mutuba mwasibuka, era nga abadde muwanguzi mu ngeri nyingi.
Omulabirizi wa West Buganda eyawummula Kitaffe mu Katonda Henry Katumba Ttaamale nga yakulembeddemu okusaba kw’okweebaza Katonda olw’obulamu bwa Amb William Matovu obw’Ebibala, yebazizza Ssaabasajja Kabaka olwokusiima naweerezebwa Omugenzi mu biti ebyenjawulo, okutuusa obuweereza obulungi eri abantube.
Omugenzi Amb William Bill Matovu Kaboga yavudde mu bulamu bwensi ku ntandikwa ya wiiki eno, era nga akoledde Obuganda ne Uganda yonna okutwaliza ewamu.
Bisakiddwa: Kato Denis
