Ssaabasajja Kabaka Ronald Muwenda Mutebi II asiimye n’aggalawo Omusomo gw’Abataka bajjajja abakulu b’Obusolya, ogubumbujjidde mu Lubiri e Mengo.
Omusomo gw’omwaka guno gubadde ku mulamwa ogugamba nti Obuwangwa n’Ennono gwe Musingi gw’Okukuuma Obutondebwensi.
Ssaabasajja Nnyininsi Sseggwanga Musota alagidde Abataka Abakulu b’Obusolya okubeera abasaale mu kutumbula n’okutaasa obutondebwensi, nga babwaagazisa abazzukulu.
Mu bubaka bwatisse Omulangira Dr Kasim Nakibinge mu kuggalawo omusomo guno mu Lubiri e Mengo, Sserwatikalwattaka agambye nti olw’embeera embi eva ku kutyoboola Obutondebwensi, kisaanye ebifo byonna eby’Ennono n’Obuwangwa okubeera ekyokulabirako nga bikuumibwa bulungi.
Mu bubakabwe Dr Kasimu Nakibinge asabye bazzukulu ba Buganda Okusooka okukuuma ettaka okutudde Obutondebwensi,kino kiriwonye abasatuusi okulizannyirako.
Omumyuuka asooka owa Katikkiro Owek Prof Hajji Dr Twaha Kawaase Kigongo,asabye government ekole ekisoboka esale ku bbeeyi y’Amasannyalaze agekanamye, kikendeeze ku kutema emiti okwokya Amanda, n’Okusindika Omukka omukyaamu mu bwengula, negwonoona Obutonde.
Super Supreme Mufti Muhammad Ggalabuzi alabudde abantu abayiikiriza Obutondebwensi nebabutyoboola, bagambye nti balabe ba Uganda abasooka.
Minister w’Ebyobuwangwa ,Ennono ,Embiri n’Ebyokwerinda Owek Anthony Wamala, yeebazizza abazzukulu mu bika ebyenjawulo abeetabye mu musomo guno, ekigenda okuyamba abavubuka okumanya okutaakiriza Obutonde n’okukuuma ennono zabwe n’obuwangwa.
Omukubiriza w’Olukiiko lw’Abataka Omutaka Namwama Augustine Kizito Mutumba, agambye nti omusomo gw’Omwaaka guno gugenda kwongera okutumbula okunoonyereza ku nkuuma y’Obutonde, neyeebaza abataka okukunga abazzukulu.
Bisakiddwa: Kato Denis
