Omuzibizi wa ttiimu y’eggwanga ey’omupiira ogw’ebigere ey’abakazi eya Crested Cranes, Shadia Nankya, alondeddwa okuvuganya ku ngule y’omuzannyi omukazi asinze okucanga endiba ku semazinga Africa ku mutendera gwa club.
Engule gy’avuganyako eyitibwa CAF Inter club Women’s Player of the Year, era engule eno avuganyizibwako abazannyi 10.
Shadia Nankya alondeddwa olw’omutindo gwayolesa mu club ya Masar eya Misiri, gye yayambyeko okutuusa ku mutendera gwa semifinal mu mpaka za CAF Women’s Champions League eziyindira e Morocco.
Wano mu Uganda Shadia Nankya yazannyirako club ya Uganda Martyrs High School ne UCU Lady Cardinals.
Okulangirira omuzannyi asinze kujja kubeerawo nga 16 December ,2024 mu kibuga Marrakech ekya Morocco.
Bisakiddwa: Isah Kimbugwe
