Club ya Onduparaka esaliddwako mu kibinja kya club za babinywera eza Uganda Premier League, ezzeeyo mu nezzibway mu kibinja kyawansi ekya FUFA Big League, bw’ekubiddwa Maroons goolo 1-0 mu kisaawe e Luzira.
Onduparaka esigazaayo emipiira 2 okuggulawo liigi ya season eno, era yesembye n’obubonero 16.
Obubonero buno ebukungaanyizza okuva mu mipiira 26, era nga ne bweba ewangudde 2 egisigaddeyo ebeera tekyasobola kuwona kyambe.
Onduparaka yegatta ku Uganda Premier League mu 2016 n’okutuusa kati.
Season eno egitaambulidde bubi ddala, baatandika liigi eno n’ebbanja lya bubonero 2.
Emipiira egyasooka 5 egya season yagizannyira ku kisaawe ekitali kyayo ng’ekibonerezo kino kyagitekebwako FUFA olw’ebikolwa by’efujjo.
Mu mbeeya yeemu, okuvuganya ku liigi ya Uganda Premier League season eno kweyongedde ebbungumu, club zonna 3 ezivuganya ku kikopo kino bweziwangudde emipiira gyazo.
KCCA ekubye BUL goolo 1-0 mu kisaawe e Lugogo, goolo ebadde yakusimula peneti eteebeddwa Allan Okello.
Vipers ekubye Express mukwano gw’abangi goolo 5-2, Villa ekubye UPDF mu kisaawe e Bombo goolo 2-0, nga kati Vipers, KCCA ne Villa basibaganye ku bubonero 49 buli emu.
Emipiira emirala, Wakiso Giants ekubye Bright Stars goolo 2-0 mu kisaawe kya Kabaka Kyabaggu, Busoga United ekubye Arua Hill goolo 4-1, Blacks Power ekubye Gaddafi goolo 3-2.
Bisakiddwa: Issah Kimbugwe
