Ssabasajja Kabaka Ronald Muwenda Mutebi II, ayagalizza abakozi mu bitongole by’obwakabaka byonna, amazaalibwa amalungi age ssanyu n’omwaka 2026 omujja ogw’emirembe.
Ku kkono omulangira Herbert Kateregga n’Omuzaana Sorome Mirembe
Ssabasajja Kabaka asiimye naatuma omwana w’embuga Omulangira Herbert Kateregga, okubera omugenyi ow’enjawulo ku mikolo gy’ennyimba za Ssekukkulu ezibuumbujjidde mu Bulange e Mengo.
Awerekeddwako Omuzaana Sorome Mirembe.
Ba Ssenkulu b’ebitongole bya Kabaka nga bali n’Omulangira Herbert Kateregga
Ku mukolo guno gavumenti ya Buganda lwekomekkerezza emirimu gy’Omwaka guno 2025, nga 19 December, yaakuddamu okukakkalabya nga 05 January,2026.
Omulangira Herbert Kateregga era akoolezezza omuti ogwa Chrismas, ogugenda okwakira mu Bulange ng’akabonero akookujaguza ennaku enkulu ezaamazalibwa ga yesu Kristo.
Abakozi bagabuddwa ekijjulo ekyenjawulo ne keeci ekoleddwa mu kifaananyi kya Bulange.
Ku mukolo gwegumu, Katikkiro Charles Peter Mayiga, kwasinzidde naagamba nti mu mwaka guno, obwakabaka bukolaganye neebitongole ebyenjawulo omuli nebya government eya wakati, naddala mu kutaasa obutonde n’okumaliriza amasiro ge Kasubi era nti mu 2026, balina esuubi eryokukirawo.
Katikkiro Mayiga agambye nti Obwakabaka buteekawo ebitongole okwongera okusembeza obuweereza eri abantu ba Buganda era biweebwa olupimo lw’enkola y’emirimu.
CBS Radio ya Buganda yekize mu binnaabyo byonna mu buweereza obulungi omwaka guno 2025 era neweebw engabo, so nga ne 2024 yeyagitwala.
Ssabasumba w’Essaza ekkulu erya Kampala, Paul Ssemogerere, nga yaakulembeddemu okubuulira mu kusaba ku lunaku luno, asabidde eggwanga okubukalamu emirembe naddala mu kiseera kino ekyokulonda.
-Okutunda ebitawera, kikyamu kubanga tekiraga kifaananyi kituufu kyabukozi bwa sente ne mu maaso ga Katonda.
-Obwanakyemalira ye kanaluzaala w’obuhulumbo obutaggwa bantu..
-Amateeka agafuga eby’okulonda gasaanye gabeere nga gwakwata ku bulyomu, kireme kuletaaeo ndoliito n’obutali bwenkanya.eri abavuganya.
-Ekibba kalulu kyafuuka lukokobe, nga buli omu akukaaba.
“Ne president yennyini akikaaba nti abamuvuganya babba akalulu ke naddala wano mu Buganda mu 2021.
-Bekikwatako twagala mutuzzeemu essuubi nga muwuliriza abantu era nemukola ebyo ebisaanidde era ebiruma abantu
Eddoboozi ly’abantu ly’eddoboozi lya Katonda.
Omukungu Balikuddembe Joseph Ssenkusu, ssenkulu wa Buganda Royal Institute of Business and Technical Education – Mengo, abakulembeddemu okuteekateeka omukolo gw’ennyimba z’amazaalibwa g’omwaka guno 2025 agambye nti enteekateeka zibatambulidde bulungi ddala.
Ssenkulu wa CBS, Omukungu Micheal Kawooya Mwebe, nga bebannantameggwa bempaka zeebitongole bya Buganda mu buweereza, ng’engabo eno bagyeddizza omulundi ogwokubiri ogw’omudiringanywa, agambye nti obumu bwebuyambyeko ekitongole okukola obulungi n’omwaka guno.
Ndagire Juliet omukozi w’omwaka owa 2025 ku CBS, nga Katikkiro Charles Peter Mayiga amukwasa ejjinja ery’omuwendo
Ndagire Juliet ku lwabakozi banne mu Cbs yeebazizza nnyo ssabasajja, olwokumuwa omukisa naawereza mu kitongole kino ekimukuzizza naatuuka ne ku kkula lyokuba omukozi asukkulumye ku banne mu buweereza ow’omwaka 2025.
Abakozi abenjawulo bawereddwa ebirabo nengule olwokukira ku bannabwe mu bitongole ebyenjawulo, Omukozi Ndagire Juliet, yakize mu ba Cbs, Namwanje Ritah yakize mu Cbs Pewosa Nsindika Njake, Ruth Namukasa Kabali yakize mu Buganda Land Board, (BLB), David Nakibinge yasiinze mu BICUL, Ssimbwa Shan yakize mu BBS Telefayina, Kasali Alex yakize mu ba Gavumenti ya Kabaka.
Abalala Nabanja Teddy yakize mu K2, Disan Mwesigwa yakize mu bakozi ba Lubiri High Buloba Campus, Betty Regina Nanyonga yakize mu kitongole kya Namulondo Investments, Namusoke Moreen yasinze aba Lubiri High school Mengo Campus, n’abalala.
Ku mukolo guno, Choir ezenjawulo omubadde ne Choir eyaawamu eyaabakozi okuva mu bitongole byobwakabaka ebyenjawulo, ne Choir endala okubadde eya Namugongo Youth Choir, Cacemcho Choir, St Charles Lwanga Lubaga Cathedral neya St Denis Kimanya zeziyiimbye ennyimba zaamazaalibwa.
Omukolo guno era gwetabiddwa abalangira naabambejja, bannadiini omubadde nomulabirizi we Namirembe Moses Banja, Abataka b’Obusolya, abakulembera ebitongole nabakozi abalala bangi.
