Abantu ba Ssaabasajja Kabaka bakuηηaanidde ku muzikiti e Kibuli, okujjukira bwejiweze emyaka 32 bukyanga attikkirwa e Naggalabi Buddo.
Ssaabasajja Kabaka aweerezza obubaka obuzanyiddwa ku katambi n’okulagibwa ku ntimbe za TV.
Empologoma ya Buganda yebazizza Mikwano gya Buganda mu Uganda ne mu nsi endala, abawagidde emirimu gy’Obwakabaka.
Omuteregga agambye nti Akaseera ketuyingidde ak’ebyobufuzi gwe gumu ku miwaatwa eminene abalabe ba Buganda mwebatera okuyitira, naasaba abantu be babeere bagumu era abantu ab’engeri eyo babeekengere.
“Tubasaba, nga bulijjo munyiikire okwekolera mmwe mwennyini okusinga okukaabirira n’okulindirira ababaggya ku mulamwa nga babawa obunyeebwa”
Okusaala kukulembeddwamu Supreme Mufti Muhammad Shaban Ggalabuzi.
Sheik Yasin Abbas Kiweewa mu kubuulira kwe, agambye nti amatikkira ga Kabaka kabonero akawa essuubi eri abantu ba Buganda ne Uganda yonna okutwaliza awamu.
Agambye nti Allah y’alonda abantu abesoonga era naabasukkulumya ku balala.
Sheik Kiweewa agambye nti abantu abangi abeyiye e Kibuli okujaguza emyaka 32, kabonero akalaga nti abantu basiimu eri Obuganda, era basaanye batwale ebikolwa ebirungi mu maaso.
Katikkiro wa Buganda Charles Peter Mayiga agambye nti ebisomooza bibadde bingi mu myaka gino 32, naye nazaamu obuganda essuubi nti wadde bingi ebibaddewo, eky’omukisa ekisiinga Kabaka waali.
“Waliwo abaagala tukwate ku ttama, tuggwemu amaanyi tuyenjebuka, naye byonna tujja kubivuunuka.
Tunywerere ku Kabaka waffe Namunswa, era njagala okubakakasa tujjakuba bawanguzi” Katikkiro Charles Peter Mayiga
Jajja w’Obusiraamu Omulangira Kassim Nakibinge yebazizza Ssaabasajja Kabaka olw’enkolagana eriwo wakati w’Obwakabaka n’obukulembeze bw’Obusiraamu e Kibuli, nagamba nti wadde nga waaliwo abaali bagala buveewo, nti naye Ssaabasajja yabatebuka.
Akubirizza abantu bonna mu Uganda okujjumbira okulonda mu kalulu ka bonna akajja aka 2026, ate era balonde abantu abalina embavu abanaasobola okukulembera eggwanga obulungi.
Omulangira Nakibinge era akubirizza abantu abalina ebisaanyizo n’ensa besimbewo ku bifo byonna, baleme kuleka bantu bakiboggwe kubakulembera.
