Obuwumbi bwa Uganda 14 n’Omusobyo bwebwetaagisa okuzimba Ekkanisa empya ku ssomero lya Kings Collage Budo.
Ekanisa eyasooka okuzimbibwawo mu 1959 ekaddiye ate era tekyaasobola kutuuza muwendo gw’Abayizi abaliwo olwa leero.
Bwabadde yeetabye ku kyeggulo eky’okusonderako ensimbi ez’Okutandika omulimu guno ku Kings college Budo, Omulabirizi we Namirembe eyawummula kitafe mu katonda Wilberforce Kityo Luwalira asabye abantu ba Katonda okufaayo okuwagira emirimu gy’Omutonzi egyenjawulo, omuli n’Okuyamba abateesobola.
Omukulu w’Essomero lya Kings college Budo Canon John Fred Kazibwe , ategeezezza nti Ekkanisa gyebasondera ensimbi yakuyambako okulyowa emyoyo gy’Abayizi , n’Okubakuliza mu ddiini nga batya Omutonzi, ate n’Okuba n’Emitima egirumirirwa.
Omulimu gw’Okuzimba ekkanisa mu Kings college Budo gusuubirwa okutandika omwezi ogujja ogwa November, era nga ku kawumbi akalamba akabadde ketaagibwa mu ntandikwa, Obukadde obusobye mu 800 bwebusondeddwa.
Bisakiddwa: Kato Denis
