Abakulembeze ku mitendera egy’enjawulo mu Uganda ne mu nsi yonna, baweereza obubaka obusaasira ekelezia katolika ne Vatican ng’ensi entukuvu omutuula Paapa, olw’okufa kwa Ssaabalangira wa Eklezia omulambika Ppaapa Francis.
Ppaapa Francis ye paapa owe 266 owaklezia katulika.
Donald Trump
Omukulembeze wa Amerika John Fred Donald Trump, alagidde Bendera za Amerika zonna omuli n’ez’amasaza, zeewuubire wakati w’emirongooti mu mbeera ey’okukungubagira Paapa Francis, gw’ayogeddeko nti abadde mukulembeze mulungi.
Obwakabaka bwa Buganda
Obwakabaka bwa Buganda busaasidde nnyo Eklezia w’omukama, olw’okufiirwa omukulembeze waayo ow’okuntikko.
Katikkiro wa Buganda CPM; ayogedde ku bwetoowaze bwa Paapa Francis obutasangikasangika, era obukulembeze bwe bunajjukirwa nnyo eri Buganda ne Uganda ey’awamu.
Ssaabaminister Robinah Nabbanja
Ssabaminisita w’eggwanga Robinah Nabbanja agambye nti Paapa abadde kabonero ka mirembe eri ensi yonna, kubanga ebbanga lyonna okuyigiriza kwe, kubadde kwetooloolera nnyo ku mirembe
Commissioner wa Parliament Mathias Mpuuga Nsamba:
Commissioner wa Parliament Owek Mathias Nsamba nga gyebuvuddeko yaliko e Vatican, agambye nti okuffa kw’omuttukuvu Paapa kubasanyalazza nnyo ng’Abakrisitu.
Owek Mpuuga agambye nti Omuttukuvu Paapa tabadde musumba kyokka, wabula abadde ddoboozi ddene nnyo ku nsonga ezinyigiriza omwana w’omuntu.
Okusinziira ku bubaka obufulumiziddwa e Vatican, Paapa Francis afudde enkya yaleero ku saawa 7:35am, era afiiridde ku myaka 88.
Paapa Francis ng’amannya ge amabatize ye Jorge Mario Bergoglio yalondebwa nga Paapa nga 13 March, 2013, okudda mu bigere bya Paapa Bendicto XVI eyali awumudde obuweereza.
Ppaapa Francis y’abadde Paapa owe 266, mu byafaayo bya ekelezia Katolika; era ye Paapa eyasooka okuva ku mu latin America era nga nzaalwa ye Argentina.
Paapa Francis yasembyeyo okwetaba mu missa y’okujaguzaPaasika ku St. Peter’s Basillica, era n’awuubira ku Bakristu abaakuηaanye mu bungi.
Paapa Francis yalabise nga mugonvu; era omukka yabadde agujja wala.
Mu bigambo ebitono bye yayogedde, yayagaliza abantu Paasika ennungi, ebisigadde n’abirekera Bakalabaalaba b’omukolo ogwo, nabategeeza nti bajja kubisomera abantu.
W’afiiridde; Paapa Francis abadde yaakasiibulwa okuva mu ddwaliro Gemeli Hospital mu Italy, gyeyamala wiiki 5 nga ajjanjabwa Lubyamira, eyamukosa amawuggwe n’akaluubirizibwa mu kussa.
Amawulire ag’okufa kwa Paapa gaalangiriddwa Kelvin Cardinal Farrell; Camarlengo of the Apostolic Chambers; ng’ono y’avunaanyizibwa ku by’obugagga n’enzirukanya y’emirimu e Vatican, nga era mu kaseera kano ye mukulembeze wa Vatican ow’ekiseera.
E Vatican abakirisitu bakyekuluumulula okugenda mu kibangirizi kya St Peter’s Square, nga bakutte emisaalaba ne ssapule mu nnaku etegambika, nga bakungubaga olwokuffa Kw’omutukuvu paapa.
Okusinziira ku mawulire agava e Vatican, Paapa Francis tagenda kuziikibwa Vatican nga bwekizze kikolebwa kuba Paapa abalala, ye yalaama kumuziika Roma ku klezia ya Santa Mary Majjorie ekibadde kyaludde okubaawo mu byafaayo bya myaka 100 egiyise.
Obugenyi bwa Paapa mu Uganda:
Mu myaka 3 egyasooka mu bukulembeze bwa Paapa Francis, mu mwaka 2015 yagenyiwalako mu Uganda, Uganda bweyali ejjukira emyaka 50 egyabajulizi okuva lwebaalangirirwa mu lubu lyabatuukirivu, era yeyayimba emmisa ku kiggwa kyabajjulizi e Namugongo.
Mu mmisa eno, Ssaabasajja Kabaka Ronald Muwenda Mutebi II yasiima nagyetabamu ng’ali wamu ne Nnabagereka Sylivia Najjinda.
Ku bugenyi obwo Ssaabasajja Kabaka yasiima naasisinkana Paapa Francis mu maka g’obwa Ssabassumba w’essaza ekkulu erya Kampala e Lubaga, namuttonera ekirabo ne Paapa naye namutonera amakula.
Omuttukuvu Paapa mu bugenyi bwe mu Uganda, yakyaalako ne mu kifo Kyabakateeyamba e Nalukolongo, era ku bugenyi bwe buno yasisinkana abavubuka.
Mu nnambika ya ekelezia Katolika; omuttukuvu Paapa ye musika womutume Peetero, Yezu gweyeerondera okuliisanga endiga ze.#
