Obululu bw’omutendera gwa semifinal obw’empaka z’amatendekero agawaggulu ez’omupiira ogw’ebigere eza Pespsi University Football League bukwatiddwa, zisigaddemu University 4.
Obululu buno bukwatiddwa ku Kati Kati Restaurant e Lugogo mu Kampala.
Islamic University in Uganda IUIU akalulu kagisudde ku St Lawrence University.
Uganda Martyrs University Nkozi egenda kuttunka n’omuwanguzi wakati wa Muteesa The First Royal University ne Bugema University.
Kinnajjukirwa nti Muteesa One Royal University ne Bugema University bakyali mu mbuga za mateeka olw’omupiira wakati wa University zombiriri ogw’okuddiηηana ogwayiika e Bugema.
Muteesa One Royal University yaddukira mu kakiiko akakwasisa empisa n’amateeka mu mpaka zino, ne bawawabira Bugema University olw’ebikolwa ebitaali bya mupiira ebyalabikira mu mupiira guno naddala okuva eri abawagizi ba Bugema University, abatuuka n’okulumya abawagizi ba Muteesa, ekyaletera omupiira guno obutaggwa.
Oluzannya olwasooka e Kirumba Masaka, ttiimu zino zaagwa amaliri ga goolo 1-1, ate omupiira gw’okuddingana gwayiika gakyali maliri ga 0-0.
Oluzannya olusooka olwa semifinal lugenda kuberawo nga 08 omwezi ogujja ogw’okuuna, ate okuddingana kuberewo nga 15 era omwezi ogw’okuuna.
Nkumba University be bannantameggwa ba season ewedde.
Bisakiddwa: Isah Kimbugwe
