Ministry y’ebyobulamu etongozza okugaba ebitabo ebigenda okuluηamya abasawo abagema endwadde ez’enjawulo okwetoloola eggwanga lyonna, ku ngeri entuufu gyebalina okukolamu omulimu gwabwe.
Okutongoza okugaba ebitabo bino kubadde ku kitebe ekikulu ekya ministry yebyobulamu mu Kampala.
Biweereddwayo ebitongole okuli ekya Africa Medical and Research Foundation, MasterCard foundation NE Africa Center for Disease Control and prevention, okutumbula obukugu bwabasawo abagema endwadde ez’enjawulo.
Bwabadde atongoza okugaba ebitabo bino, omukungu mu ministry yebyobulamu Dr. Driwale Alfred asabye abakulira eby’obulamu mu district ez’enjawulo okugaba ebitabo ebyo kisobozese abasawo okukola omulimu ogw’omutindo.
Agambye nti omulimu gwokugema endwadde gweyongera okukaluba buli olukya olw’endwadde ezibalukawo entakera, nga kati Bagema endwadde 14 mu baana, okuva ku 6 ezaagemwanga edda.
Wabula Driwale era agambye nti musanyufu olw’okukendeera kw’omuwendo gw’abaana abafa omusujja gw’ensiri, nga kino kivudde ku kugema baana bwatyo naasaba abazadde okujjumbira okugema abaana.
Bisakiddwa: Ssekajjijja Augustus
