Katikkiro wa Buganda munnamateeka Charles Peter Mayiga ayambalidde abakuuma ddembe abasusizza okutyoboola eddembe ly’obuntu, nga bannansi bakwattibwa mungeri ettagoberera mateeka .
Katikkiro abadde atongoza alipoota y’akakiiko k’eddembe ly’obuntu aka district ye Wakiso ey’omulundi ogwokutaano, emikolo gyibadde ku kitebe kya district.
Alipoota eno eraze nti abantu abasoba mu 360,000 bebaagobebwa ku ttaka mu mwaka ogwayita 2024, atte nebatafuna kuyambibwa.
Emisango 89 gyegyaloopebwa nga gyekuusa ku kutulugunyizibwa nga kwesigama ku kikula ky’abantu , obutabanguko mu maka emisango 14,073 gyejaalopwa.
Ensonga endala ezirabikidde mu alipoota eno mwemuli obutali bwenkanya mu program za government naddala eya Parish Development Model, emyooga n’emirala, ng’abantu bangi naddala abaliko obulemu bakaluubirizibwa okuzifunamu.
Ensonga z’abaami obutafa ku baana nazo zinokoddwayo mu alipoota y’akakiiko n’ensonga endala nyingi
Katikkiro Mayiga asuubizza nti Obwakabaka bugenda kukolera wamu n’obukiiko obulwanirira eddembe ly’obuntu, era nasaba district ezitanassa munkola bukiiko buno okulowooza ku nsonga eno mu bwangu .
Dr. Livingstone Ssewanyana akulira ekitongole ekirwanirira eddembe lyobuntu ekya Foundation For Human Rights Initiative asabye buli gwekikwatako okuyambako ku nsonga y’abantu abawambibwa naddala mu kiseera kino ekya Kalulu.
Ssewannyana agambye nti ekityoboola ddembe lya buntu ekyaliwo mu kalulu ka 2021, tekirina kuddamu kulwabwako mu kalulu akajja aka 2026, ne mu biseera by’eggwanga ebirala byonna okutwalira awamu.
Elly Kasirye Ssentebe w’akakiiko keddembe ly’obuntu mu Wakiso anokoddeyo ezimu kunsonga enkulu akakiiko zekakozeeko mutaasa abatuuze .
Ssentebe wÁkakiiko kéddembe lyÓbuntu ku district ye Wakiso Elly Kasirye asabye Obwakabaka bwa Buganda okukwatira awamu nÁkakiiko kano okulaba ng’ebikolwa ebityoboola eddembe ly’obuntu birwanyisibwa.
Ssentebe wa district ye Wakiso Dr. Matia Lwanga Bwanika agamba nti ebimu kubiviriddeko bannansi okutulugunyizibwa yensonga yabannauganda okwesamba ennimi zabwe nga buli biwandiiko bikolebwa mu nnimi ngwiira, nebalema okutegeera obulungi ensonga ezibakwatako obutereevu.
Betty Ethel Naluyima omubaka omukyala owa district ye Wakiso agamba nti obunkeeke obusukiridde eri bannabyabufuzi nga bakwatibwa nebasibwa mu makomera buli kiseera, kiviriddeko bangi okwenyiwa ebyobufuzi .
Mungeri yemu ye Omwami wakabaka atwala essaza Busiro Ssebwana Charles Kiberu Kisiriiza akubiriza banna Wakiso okwetegereza obulungi abakulembeze bebagenda okulonda mu kalulu akajja 2026, baleme kulondesa kinyumu.
Akakiiko kano aka Wakiso District Human Rights Committee mu ngeri eyenjawulo kasiimye ssentebe wa district ye Wakiso Dr. Matia Lwanga Bwanika wamu ne munnamawulire wa CBS Emmanduso Tonny Evans Ngabo olw’obuwereza obusukkulumye mukulwanirira eddembe lyobuntu, era baweereddwa ebbaluwa ezibasiima#
