Kamalabyonna wa Buganda Charles Peter Mayiga asabye abavunaanyizibwa ku byokwerinda mu ggwanga okunyweza enkolagana wakati waabwe naabo bebakuuma, kimalewo obutali butebenkevu mu ggwanga.
Bwabadde asisinkanye Omubaka wa president owa Lubaga Omugya Moses Ariho mu Bulange e Mengo, Katikkiro ategeezezza nti obutawuliziganya wakati w’Ekitongole byokwerinda n’Abantu kuvaamu enkola y’Emirimu obutabeera nnungi, n’obutesigaηana, naasaba Omubaka wa president okuteekawo enkolagana ennungi n’abantu ba bulijjo n’okubawuliriza.
Katikkiro era asabye ab’ebyokwerinda okukwata obulungi buli ludda oluvuganya mu by’obufuzi, baleme kulaga lyanyi lisukkiridde ku lw’obulungi bw’eggwanga, era naabajuliza olugero olugamba nti “Amaanyi ameemanye gaamala ebita embuga”.
Katikkiro asabye Omubaka wa president Ariho Okumanya nti ekifo ekimuweereddwa kijjuddemu eby’Obugagga bwa Buganda ne Uganda yonna eby’Omuwendo, nga bisaanye okukuumibwa obutitibiri.
Anokoddeyo Olubiri lw’e Mmengo, Amasiro g’e Kasubi, Bulange, lutikko ye Lubaga ne Namirembe, ennyanja ya Kabaka, ng’ebimu ku bifo ebikulu nnyo ebiri mu kitundu kye Lubaga.
Omubaka wa president owa Lubaga Ariho Moses, yebazizza Ssaabasajja Kabaka ne gavumenti ye olwokuwagira entekateeka za government ezenjawulo, eziyambyeeko mu kusitula eggwanga Uganda.#
Bisakiddwa: Kato Denis
