Obwakabaka bwa Buganda bulabudde abantu baabwo abali ebweru wa Buganda obutakkiriza kutwalibwa nnono n’Obuwangwa bw’Abazungu wabula banyweeze byebalina.
Abadde ayogerako eri Abavubuka ba Baganda Nkobazambogo ababeera mu Mbale,Teso ne Bukedi.
Omukolo guyindidde ku Islamic University in Uganda e Mbale.
Asabye abantu ba Kabaka obutafeebya buwangwa bwabwe nebatuuka n’okusuula olulimi lwabwe, okweggyako mannya gaabwe ag’obuzaale n’abalala okutuuma erinnya limu mu baana bonna abazaalibwa mu maka.
Akubirizza abavubuka okufaayo ennyo okuyiga obuwangwa bwabwe nga bakyali bato, baleme kukaluubirizibwa kubutegeera nga bakuze.
Katikkiro wa Buganda asabye abaganda Okumanya ekitiibwa n’Amaanyi agali mu Buwangwa , nga balina kusooka kukulembeza okutaasa Nnamulondo n’Okugiwa ekitiibwa.
Katikkiro mungeri eyenjawulo asabye Abavubuka okugoberera ebifa Embuga nga bakoseze emitimbagano,baleme kulimbibbwa ba Nnakigwanyizi, naabasaba okwekwaata Radio ya Beene CBS.
Katikkiro asabye Bannankobazambogo abayivu, okukulemberamu Olutalo lw’Okununula byonna ebyali byawambibwa abagwiira, beewalira ddala empisa zaabwe ezifeebya ezaabwe n’ebyabwe.
Minister wa Kabaka ow’Abavubuka,eby’emizannyo n’Ebitone Owek Robert Sserwanga Ssalongo asabye abakulembeze b’Abavubuka okukozesa obuyivu bwaabwe bakyuuse embeera zabwe ng’abantu, nebebakulembera.
Atwala ssettendekero wa IUIU Ismael Ssimbwa yebazizza Ssaabasajja Kabaka, government.ye ekulemberwa Kamalabyonna n’Abantu ba Kabaka olw’Obuwagizi obwenjawulo eri ebyenjigiriza, Ebyobulimi, n’Obutondebwensi.
Omwami wa Kabaka amukulembererako Essaza lye Mbale Owek Rashid Nsubuga, ategeezezza nti Abantu ba Kabaka e Mbale Teso ne Bukedi bajjumbidde nnyo entekateeka za Ssemunywa , ekibawadde amaanyi okuweereza.
Ssentebe wa Nkobazambogo omuwummuze mu bendobendo lye Mbale Teso ne Bukedi Kabuye Kenneth nga asikiziddwa Kakooza Arafat Ssemanda, yebazizza Abavubuka ba Buganda abeewaddeyo okukuuma Obuwangwa n’Ennono za Buganda.
Omukolo guno gwetabiddwako minister wa Kabaka owamawulire,Okukunga era Omwogezi w’Obwakabaka Owek Isreal Kazibwe Kitooke, abakulembeze ba Ssaabasajja e Busoga, bannankobazambogo mu Uganda yonna n’Abantu abalala bangi.
Katikkiro ku ssettendekero wa IUIU asimbyeko Omuti gw’Ekijjulizo, omubadde n’Okutongoza ekizimbe Kya ba Yinginiya ne tekinologiya.
Abavubuka ba Nkobazambogo basoose ku kyoto gyebaasomeseddwa ku nsonga ez’enjawulo, ng’essira liteekeddwa ku muvubuka afaayo eri obulamu bwe, ng’akola ebintu eby’ensonga era eby’obuvunaanyizibwa.
Bisakiddwa: Kato Denis
