Ekizimbe ekigguddwaawo kiwezaako emyaliiro etaano, era kwekuli ekitebe kya Buddu CBS Pewosa Sacco, Sso nga kyakukozesebwa okubudamyaako yafeesi z’ebitongole ebyenjawulo.
Mu kuggalawo ekizimbe kino Katikkiro yeegattiddwaako Omulabirizi wa West Buganda Gaster Nsereko, Omusumba we Masaka Siriverous Jumba, ba minister ba Buganda, ne ba ssentebe ba CBS Pewosa Sacco abavudde mu matabi amalala.
Omulabirizi wa West Buganda Gaster Nsereko asabye ekizimbe kino kikozesebwe bulungi kyongere okuweesa Obwakabaka ekitiibwa.
Omusumba w’Essaza lye Masaka Sirverus Jumba naye asabye ebibiina bya PEWOSA ebirala mu Bwakabaka bwonna okulabira ku Banna Buddu, bongere amaanyi mu Bweegassi.
Mpakibi Waiswa Robert nga mukungu mu ministry y’Ebyobusuubuzi n’Obwegassi ku lwa ministry, atenderezza Radio ya Beene CBS olwokutumbula Obweegassi, era naasaba wassibwewo enkola ekuuma omutindo, ekifaananyi Kya CBS Pewosa Sacco kireme kusaabululwa bannakigwanyizi.
Ssentebe wa Boodi ya CBS Omuk David Balaaka ng’akiikiriddwa ssenkulu wa Radio ya Kabaka Omuk Michael Kawooya Mwebe, yeebazizza Ssaabasajja Kabaka olw’okuteekawo Radio CBS efuuse ensonga, mungeri eyenjawulo neyeebaza Owek Mathias Mpuuga Nsamba, Owek Kaddu Kiberu n’Abakulembeze ku mitendera egyenjawulo, abayambye ennyo abantu ba Kabaka okwekulaakulanya.
Omwami wa Ssaabasajja amukulembererako essaza Buddu Pookino Jude Muleke, ategeezezza nti okuggulawo ekizimbe ky’Obweegassi mu Kibuga Masaka ,kabonero akalaga Obukulembeze obuwa essuubi abantu bwebetaaga.
Ssentebe wa Boodi ya Buddu CBS PEWOSA SACCO Owek Bbaale Mugera, ategeezezza nti ekyabawaliriza Okuzimba ekkakkalabizo eryaabwe kyali kiragiro kya Kabaka, eky’okubunyisa enjiri y’Obweegassi mu Buddu.
Ekibiina kya Buddu CBS PEWOSA SACCO kyawomwamu omutwe Owek Mathias Mpuuga Nsamba n’Owek Bbaale Mugera, era kati kiweza abateresi abawera Omutwaalo mulamba n’Omusobyo.
Bisakiddwa: Kato Denis
Ebifaananyi: MK Musa
