Abantu ba Kabaka okuva mu masaza Gomba, Butambala ne Ssingo bakiise embuga mu nkola ya Luwalo Lwange, bazze n’oluwalo lwa bukadde bwa shs 56,976,300.
Batikkuddwa Ssaabawolereza wa Buganda Owek. Christopher Bwanika ku lwa Katikkiro.
Abasabye okunyweza obumu n’okutambulira ku Ssemasonga ettaano ezaasoosowazibwa Obwakabaka.
Abakuutidde obutagendera ku bigambo by’abeenoonyeza ebyabwe, eddoboozi bawulire limu lyokka eriva embuga.
Eggombolola ezikiise okuva e Gomba ye; Mumyuka Mpenja, Ssaabawaali Kyegonza, Ssaabagabo Kabulassoke ne Ssaabaddu Maddu.
Mu ssaza Ssingo evuddeyo eggombolola emu, Ssaabaddu Kassanda ate e Butambala kubaddeko Ssaabawaali Bulo, Ssaabaddu Ngando ne Kalamba.
Minister w’Amawulire, Okukunga abantu era Omwogezi wa Buganda ku lwa minister wa government ezeebitundu Owek. Joseph Kawuki asabye abaami b’eggombolola bulijjo okutambulira ku nnambika eyabaweebwa mu ntambuza y’emirimu baleme kukontana.
Omwami w’essaza Ggomba Kitunzi Mugabi Fred William aloopye banna Gomba nti ku nsonga ezikwatagana ne Buganda abantu baakulembera bali bumu awatali kutula mu nzikiriza, byabufuzi oba ekintu ekirala kyonna.
Kitunzi yeeyamye nti ye n’olukiiko olukulembera essaza baakunyiikira okusoosowaza enteekateeka za Buganda zonna okuli eby’obulamu obulimi naddala emmwanyi.
Mu ngeri yeemu Kitunzi ategezezza Katikkiro nti abakulembeze mu government eyaawakati batambulira wamu mu kukola emirimu gya Kabaka.
Abamu ku baami bategeezezza Katikkiro okusoomoozebwa kwebasanga naddala mu bannakigwanyizi abeesenza ku ttaka ly’embuga, nebasaba aba Buganda Land Board babayambeko ku nsonga eno.
Ssaabaddu Maddu Omukyala Sarah Kiberu agambye nti wadde Kabaka yabawa ettaka okwazimbibwa akatale era kaggwa, wabula balina okusoomoozebwa nti tekannaggulwawo kubanga waliwo obutakwatagana mu bakulembeze abakwatibwako ensonga y’akatale ako.
Mu bakiise embuga mubaddemu n’abayizi okuva mu masomero ag’enjawulo.
Bisakiddwa: Kamulegeya Achileo K.
