Ekibiina ekiddukanya omupiira mu Uganda ekya FUFA, kirangiridde Charles Ayiekoh ng’omutendesi omuggya ow’ekiseera owa ttiimu y’eggwanga ey’abakazi eya Crested Cranes.
Charles Ayiekoh ne banne bwe balondeddwa ku mulimu guno, bagenda kukola omulimu guno okumala ebbanga lya mwezi gumu gwokka.
Charles Ayiekoh ku mulimu guno agenda ku myukibwa Eric Ndifuna, Olivia Mbekeka ye mumyuka ow’okubiri, Stephen Kiggundu ye mutendesi wa bakwaasi goolo, Felix Ayobo wa dduyiro, Mable Kabatalindwa musawo wa ttiimu ate Darlian Kyasiimire ye musawo w’ebinywa.
Emirimu gyabwe bagitandikiddewo era bagenda kutandika n’okuteekateeka ttiimu egenda okuvuganya mu mpaka ez’okusunsulamu ensi ezinaakiika mu Olympics 2024, nga Uganda egenda kuttunka ne Cameroon ku mutendera gwa second round mu kusunsulamu.
Ku mutendera gwa first round Uganda yayitawo oluvanyuma lw’okuwandulamu Rwanda ku mugatte gwa goolo 4-3, nga ttiimu ku mulundi ogwo yali etendekebwa Ayub Khalifah Kiyingi.
Mu kiseera kye kimu FUFA ekyali munteekateeka ez’okulonda omutendesi omugya owa ttiimu, era gye buvuddeko Abdallah Mubiru yalondebwa ku kifo ky’omumyuka w’omutendesi naye nakigaana.
Bisakiddwa: Isah Kimbugwe
