Omutendera Kinyoolankoto mu program Entanda ya Buganda, Boogere Richard eyafunye obugoba 25 ne Balunginsiiti Stevens eyafunye obugoba 21 baayiseewo okweyongerayo ate Kabuuka Jamiiru eyafunye obugoba 17, yawanduse
Biibino ebibuuzo by’entanda “Kinyoolankoto”;
1. Omuntu gwebaasibanga emikono mu maaso nga bamutwala ku mbuga yabanga azzizza musango ki? – Gwa kulwana
2. Ekikolwa kya Nabikande okukima omuzaana mu lubiri agende amulabirire kiweebwa linnya ki? – Okugula Omuzaana
3. Okusiika ebinyomo kisoko, kitegeeza ki? – Kumala budde mu bitagasa
4. Ani yawandiika omuzannyo Nnamulanda? – Waalabyeki Magoba
5. Kyakula ndaba abulwa waazaala, amakulu ki agali mu lugero olwo? – Abantu abamu bafiirwa emikisa gyabwe lwakwekwasa busongasonga
6. Amakulu agali mu linnya Kyafubutuka eryatumwa omulongo wa Kabaka Tebuukwereke – Yakolanga nnyo ebintu ng’apapa nga tasoose kwetegereza
7. Magezi ki agali mu kikolwa ky’obutalya nswa esooka okufuluma? – Oleme kukanga nswa, n’omuntu obutamala biseera ku nswa eba egenze
8. Ekibumbe kya Katikkiro wa Buganda ekiri ku luguudo Kampala Road – Katikkiro Michael Kawalya Kaggwa
9. Omuganda bweyalabanga omuntu nga bamusibye omugwa mu kiwato, yabanga azzizza musango ki? – Yabanga agaanye okusasula omusolo
10. Ekisaanyizo ekikulu ekisooka okulowoozebwako mu mpisa y’okulonda Nnabikande – Alina kuba muganda wa Nnamasole
11. Okukamulira omuntu olukoni ku liiso kisoko, kitegeeza ki? – Okukwatirwa omuntu ettima
12. Ani yawandiika Omuzannyo, Ssemitego Omuyizzi Kkungwa? – Mercy Mirembe
13. Nnajjukiranga ne nseka nga sigwebakigambye, olugero olwo lulimu makulu ki? – Abantu abamu bakudaalira nnyo mu bizibu bya bannaabwe
14. Erinnya Wazziba eryatuumwa omulangira wa Kabaka Jjemba lirimu makulu ki? – Yaziba abalangira abalala amaaso n’abalyako Obwakabaka
15. Bwoba ova okuzuuka enswa, kizira okufuluma ebweru ng’omaze okuyingira enju, Magezi ki agakirimu – Okwewala ensolo eziyinza okukutuusaako obulabe
16. Enguudo mu Kibuga Kampala ezabbulwamu amannya g’amasaza ga Buganda – Kyaddondo Road ne Kyaggwe Road
17. Waliwo lwosanga omuntu nga bamusibidde emikono emabega, aba yazzizza musango ki? – Aba yabbye
18. Ennono y’erinnya Nnabikande – Okuggya eddagala ku lukande
19. Kakutiya okukwezingako, kisoko kitegeeza ki? – Omuntu abeera mu njala olubeerera
20. Ani yawandiika omuzannyo Nze mbimaze – Prisca Nakitto
21. Amakulu agali mu lugero Kiridde bwami tekibulwa nganda – Omuntu bwatuuka awalungi tabulwako bamutuukirira
22. Omulongo wa Kabaka Jjunju yamutuuma Tawutta, Magezi ki agali mu linnya eryo? – Kabaka nebwakaddiwa asigala ategeera
23. Eriiso ly’enswa tebalisonzaamu lugalo, balisonzaamu ki? – Kinonko
24. Oluguudo olwayitibwanga Southern Street, kati luyitibwa lutya? – Benedicto Kiwanuka Street
25. Omuntu okufuuka omutwalo kisoko, kitegeeza ki? Kufa
26. Ekitembe kibalako amatembe, bwotagayita matembe ogayita otya? – Amafuluuta
27. Kkoyi kkoyi, omwana ow’eddalu azaalibwa ddi? – Nnaku zino
28. Olugero: Kabaka akussa owuwo – essanja libabula endagala
29. Ababaazi balina kyebayita kaamuddiba, kyeki? – Ye nnyama gyebasubula mu ddiba
30. Ekisaanikira ky’ensuwa? – Ssibiiti
31. Kiki Omuganda kyayita empawa? – Ebiwaawaatiro by’ekinyonyi
32. Enjuki esooka ku ssogolero tebagiganya kudda gyevudde lwaki? – Bweddayo eyinza okuyita endala nezijja nezitaataaganya abasogozi
33. Kabaka ki eyakuba olubiri lwe ku lusozi, Nkaawo nga buli kati ekifo ekyo kikyaliwo? – Mwanga II
34. Omuti kwebasitulira ensolo eyiggiddwa? – Omuluumu
35. Olugero: Omulungi akunoba – Enjala netagwa
36. Mu mirimu egikolerwa Kabaka mulimu n’ogwokuwala amaliba, mutaka ki akivunaanyizibwa ku ekyo? – Omutaka Katula
37. Ekisoko, Okukumbira omuwala kitegeeza ki? – Okwogereza omuwala
38. Mu mpisa z’Abaganda waliwo lwebaabiza omusajja olumbe wadde nga bakimanyi nti omusajja oyo gyali mulamu, kibaawo ddi? – Ssinga omusajja yeefumbiza eri omukazi
39. Entumwa tettirwa gyebagituma, tuwe amakulu ga mirundi ebiri ag’entumwa? – Omuntu aweereddwa obubaka okubutwala awantu n’enjuki esooka ku ssogolero
40. Enjulu ezinaaluka ekibbo bazooka kuzifumba bakikola batya? – Baziteeka mu kigogo
41. Kasooli w’empeke bwafumbibwa n’aliibwa ng’emmere aweebwa linnya ki? – Mpengere
42. Embaata z’okumazzi omuganda yaziwa linnya ki? – Ebiyoyo
43. Omuntu Omuganda gwayita Nnantabwaza yaaba atya? – Omuntu omwavu ennyo
44. Olugero: Ssenkuba ya ggulo – Bwetakuba mubbi ekuba mulogo
45. Obuvunaanyizibwa bwa Kiweewa omwana omulenzi omukulu owa Kabaka, bwe buliwa? – Okulabirira abaana ba kitaawe abalangira n’abambejja obutatuusibwako bulabe
Bitegekeddwa: Kamulegeya Achileo K
