Omuliro gukutte ekisulo ky’abayizi abawala ku ssomero lya government erya Kisozi Seed Secondary School okumpi n’edduundiro lya President Museveni mu district ye Gomba , buli kimu ekibadde mu kisulo kisaanyeewo.
Akulira essomero lino Barigye Robert agambye nti boogeddeko n’abayizi ababiri ababadde abagonvu nga bawummuddeko mu kisulo, babategeezezza nti bawulidde ekintu ekibwatuka omulundi gumu, ekiddiridde gubadde muliro kutandika kutuntumuka, naye ng’ekituufu ekivuddeko omuliro tekinamanyika.
Agambye abachina abakola enguudo mu kitundu ekyo, wamu n’abasirikale ku dduundiro lya president, baleese ebimmotoka byabwe ebirimu amazzi nebayamba okuzikiza omuliro.
Headmaster Barigye agambye nti balagidde abayizi aba S.1 ne S.2 badde ewaka basooke bawummulemu, ng’essomero bweritereeza embeera.#
Bisakiddwa: Patrick Sserugo
