Minister w’obuwangwa, ennono, embiri, Amasiro, Enyokwerinda n’Olulimi Oluganda Owek. Dr Anthony Wamala asabye ebika mu Buganda byonna okutwala ensonga y’okuwandiisa eby’obugaga by’ebika ng’ekikulu ennyo nga Ssaabasajja bweyalagira kikendeeza sinakindi okumalirawo ddala bannakigwanyizi abanyaga eby’obugaga by’ebika.
Owek. Wamala abadde yeetabye ku mukolo abakulembeze abaggya mu kika ky’Engabi Ennyunga kwebakubidde ebirayiro byabwe okutandika obuweereza ogubadde ku office z’ekika e Katwe mu Kampala.
Agambye nti kisaanidde ebyobugagga okuwandiisibwa mu Kika Trust, okutereeza embuga z’ebika, ebika okufuna ebintu evivaamu ensimbi olwo omugugu ku bazzukulu gukendeere.
“Tewali ava mu kika kirala kutunda byabugagga bwa kika kirala, n’olwekyo twetaaga okunyweza n’okukuuma ebyobugagga bw’ekika nga Ssaabasajja bweyatulagira”
Omukubiriza w’Olukiiko lw’Abataka abakulu b’obusolya Omutaka Nnamwama Dr. Augustine Kizito Mutumba yennyamidde olw’abantu abeefunyiridde okuvvoola Obwakabaka n’abamu nebatuuka n’okulumba embuga z’amasaza n’ekigendererwa ky’okuziwamba n’alabula abakikola nti okucookooza kuno kwandireetera abantu ba Kabaka okwecaawa.
“Tulina okusoomoozebwa okuzze kulabika mu bantu abaagala okutufufunyaza mu buwangwa bwaffe n’ennono, muwulira bangi abagezaako okuvvoola obwakakaba, waliwo n’abaabadde bagezaako okuwamba essaza, ebintu bya kuwamba buwambi, tuli bantu bamirembe mu Buganda, naye tetwagala kucookoozebwa, abantu baffe basobola okukola ekisingawo ko, Naye Buganda etambudde n’amateeka, kituluma okubala abantu abaagala okutucookooza buli omu akimanyi, nti Buganda twasangibwawo, ebiwandiiko byaggya luvannyuma, tetwala bantu batufootoola”
Omutaka Kannyana Daniel Kiwana akulira ekika ky’Engabi Ennyunga yeebazizza nnyo abakulembeze abawummudde olw’obuweereza obulungi n’asaba abakulembeze abaggya okukola obutaweera batuuse ekika kyabwe ku ntikko n’okusaba bazzukulube bawagire emirimu gy’ekika.
Abalayidde kuliko Dr. Abasa Kabogo Muchondwa nga Katikkiro w’ekika, Joseph Lubega Bazoonoona nga omumyuka asooka owa Katikkiro, Stephen Muyunga ng’omumyuka owookubiri owa Katikkiro n’abalala okuli n’Omusaasredooti Rev Fr. Edward Ssekabanja eyaweereddwa eky’okulungamya eby’enzikiriza mu kika.
Bano beeyamye okuweereza ekika kyabwe n’Obuganda bwonna awatali kutuiririra Ssaabasajja.
Bisakiddwa: Kamulegeya Achileo K