Omulamuzi Herbert Asiimwe ayimirizza enteekateeka y’okuddamu okubala obululu bw’ekifo ky’omubaka wa Parliament owa Kalungu West gyeyali yalagira, oluvannyuma lw’okusanga nga bokisi 5 ku 102 ez’obululu obwakubwa nga teziriiko nvumbo (seal) nga ziraga nti zaakutuka.
Okuddamu okubala obululu kubadde ku kitebe ky’okulonda mu district y’e Kalungu.
Omulamuzi Herbert Asiimwe awadde omuwaabi Ismael Ssemakula amagezi agende mu kkooti enkulu esalewo ekiddako.
Mu kusooka omulamuzi yali alagidde obululu buddibwemu okubalwa, oluvanyuma lwa Ssemakula okwemulugunya nti obululu bwe bwabalibwa bubi.
Akulira eby’okulonda e Kalungu Teddy Nabukenya yalangirira Joseph Gozanga Ssewungu ku buwanguzi bw’ekifo kino ku bululu 10,106, ate Ssemakula n’alangirirwa mu kyokubiri n’obululu 10,060, nga bamusinzeeko obululu 46.
Kalungu West erina polling station 102 kyokka ku zino, omulamuzi saako Bannamateeka ba Ssewungu n’aba Ssemakula wamu n’akakiiko k’ebyokulonda bwebatuuse mu store ewabadde wakuumirwa bokisi z’obululu buno, basanze bokisi ttaano seal zaakutuddwa ate bokisi endala nga teriiko kalambe konna akalaga gyeyavudde.
Omulamuzi Asiimwe kwekuyimiriza ebyokuddamu okubala obululu buno, nga agamba nti kkooti tekakasa oba obululu buno tebaabukuttemu.
Omulamuzi alagidde akulira ebyokulonda e Kalungu Teddy Nabukenya okuddamu bokisi z’obululu zino 6 okuziteekako obulambe bwazo n’okukuuma obutiribiri store omuli obululu buno, n’awa Ssemakula amagezi nti yeyongereyo mu kkooti esinga ku yiye.
Ssemakula Ismael ne puliida we Ambrose Tebyasa bategeezezza nti bagenda kusaba akakiiko k’ebyokulonda kanguyirize okuteeka Ssewungu mu kyapa ky’ebiwandiiko by’eggwanga, n’oluvannyuma bagende mu kkooti enkulu.
Ssewungu Joseph Gonzaga yeebazizza omulamuzi olwokugoba omusango guno, n’agamba nti ye tabbanga ku kalulu.#
