President w’e Dr. Hage G. Geingob afiiridde ku myaka 82 egy’obukulu, era ng’abadde ku bujanjabi bw’ekirwadde kya kookolo.
Dr. Hage G. Geingob afudde ssaawa nga 10 ez’ekiro nga 04 February,2024 mu ddwaliro lya Lady Pohamba Hospital mu kibuga Windhoek.
Abadde omumyuka we Dr.Namgolo Mbumba era nga kati y’akolanga president we Namibia y’abikidde Namibia n’ensi yonna.
Mbumba agambye nti wadde president Geungob abadde mugonvu ennaku eziyise, naye abasawo ababadde bamukolako babadde bakola ekisoboka era nga wabaddewo essuubi nti abadde asobola okusuuka ekitasobose, era w’afiiridde abasawo be, mukyala we Monica Geingos n’abaana babaddewo.
Dr.Namgolo Mbumba kati akolanga president ow’ekiseera, era yeyakiikirira Namibia mu lukungaana lwa NAM (Non Aligned Movement) olwe 19, olwatudde mu Uganda mu January 2024, nga mu kiseera kye kimu mukama we Dr.Hage Geingob yabadde mu ddwaliro ng’ajanjabwa.
Dr. Hage G. Geingob yazaalibwa nga 03 August 1941 mu bukiika kkono bwa Namibia.
Abadde omu ku bantu ab’enkizo abaalwana ennyo okununula Namibia, n’efuna obwetwaze okuva mu mikono gya government y’abakabbulu e South Africa abaali bakulembera Namibia, era yali omu ku baabaga ssemateeka w’eggwanga eryo.
Y’abadde president wa Namibia ow’okusatu okuva mu 2014 mu kalulu keyawangula n’ebitundu 87%, w’afiiridde ng’atambuza kisanja kyakubiri era ekibadde kinaatera okugwako, okuva mu 2019 mu kalulu keyawangula n’ebitundu 56%.
Yaliko ssaabaminister wa Namibia okumala emyaka 12, okuva mu 1990 ekisinde ky’ebyobufuzi ekya Swapo bwekyali kyakakwata obuyinza, naabuddako mu 2012.
Mu January wa 2024, abadde yalangirira nga bwameggana n’ekirwadde kya kkookolo ekyali kimaze akabanga nga kimubala embiriizi.
Mu 2013 yalonngoosebwa ku bwongo, so nga ne mu 2023 yaddusibwa mu ddwaliro e South Africa nebamulongoosa ogumu ku misuwa gy’omutima nateereera bulungi.
Abadde muwagizi wa mupiira era eyagusaambako nga muto, era nebamukazaako lya Danger point.#
