Commissioner wa Parliament Owek Mathias Mpuuga Nsamba ayolekedde mbuga z’amateeka okuwawaabira President w’ekibiina ki National Unity Platform Robert Kyagulanyi Ssentamu wamu n’omubaka wa Makindye West Allan Ssewanyana olwokumulebula n’okumwogerako ebyensimattu.
Mpuuga agambye nti Robert Kyagulanyi Ssentamu bweyabadde ayogerako eri bannakibiina ki NUP e Kavule, yagambye nti yakimanya dda nti Mathias Mpuuga Nsamba yeyasibisa ababaka ba parliament, Allan Ssewanyana n’omugenzi Mohammed Ssegirinya eyali omubaka wawa Kawempe North.
Mu nsisinkano yeemu eyo, Robert Kyagulanyi ssentamu, yatadde omubaka wa Makindye West Allan Ssewanyana kunninga akakase ebigambo ebyo nti Mpuuga yeyabasibisa.
Ababaka bombi Omugenzi Mohammed Ssegirinya ne Allan ssewanyana government yabasiba mu mwaka 2021, nebaggulako emisango gy’okukulemberamu olukwe lw’okutema n’okutta abantu mu bitundu bye Masaka ebyakyaka ennyo mu mwaka ogwo 2021, oluvanyuma lwakalulu k’omwaka 2021.
Owek Mpuuga bwabadde ayogerako eri bannamawulire ku parliament alabudde nti akooye okusiimuulira ebitoomi ku linnya lye, kagende mu mbuga zamateeka, koooti eragire Kyagulanyi atwale obujjulizi obwo bwalina obulaga nti yeyasibisa ababaka abo.
Mpuuga yewuunyizza nti Omubaka Allan Ssewanyana gweyalwanirira okuva mu nkomyo, ate yazannyisiddwa katemba okumukonjera ng’asuubiziddwa kaadi.
Mathias Mpuuga Nsamba era mwenyamivu nti omukulembeze wekibiina ekisinga obunene mu ggwanga ekyandibadde kikola obutaweera okuteekateeka bannansi okwaηηanga government eri mu buyinza, ate amaanyi ge gonna agatadde mu kulwanyisa ye Mpuuga.
