Abayizi 1064 batikkiddwa mu ttendekero lya Ssaabasajja Kabaka erya Buganda Royal institute of Business and Technical Education kakeeka Mengo.
Gano gematikkira gaayo ag’omulundi ogwe 19.
Abayizi abawala bali 607 nga bakola ebitundu 57%, ate abalenzi bali 457 bye bitundu 43%.
Abayizi 145 bafunye diploma mu masomo agenjawulo, 718 ba certificate , ate 201 bebafunye Obukugu obwenjawulo mu mirimu gyebabadde bakola mu nkola ya DIT (Non formal)
Ssenkulu w’Ettendekero lya Buganda Royal institute of Business and Technical Education Kakeeka Mengo Owek Balikuddembe Ssenkusu, ategeezezza nti abayizi abatikkiddwa olwa leero beebo abatataaganyizibwa Omuggalo ogwa Lumiima Mawuggwe COVID 19, wabula baasobola okugumiikiriza okutuusa lwebamalirizza.
Mu ngeri yeemu Owek.Ssenkusu ategeezezza Katikkiro wa Buganda Charles Peter Mayiga nti balindiridde ensala ya kooti ekwata ku bantu abesenza ku ttaka, Ssaabasajja Kabaka lyeyawa ettendekero lino, nga kooti yasuubiza okugiwa omwaka guno 2025.
Agambye nti singa ettaka lino liddira ettendekero lino, balina essuubi nti bakwongera okuligaziya n’okwongera okuwandiisa abayizi abawera.
Katikkiro wa Buganda Charles Peter Mayiga abadde omugenyi ow’enjawulo ku matikkira gano, akubirizza abatikkiddwa okugoberera ebiruubirirwa byabwe era babiwe obudde bisobole okukula nga biyita mu mitendera.
Agambye nti balina okukola n’obugumiikiriza era mubukkakkamu lwebanasobola okuwangula, bewalire ddala okwagala okufuna ensimbi ez’amangu nti kubanga tekijja kusoboka, era nga n’abanaaba basobodde okuzifuna mu bwangu bayinza okulemererwa okuzikuuma.
Amatikkira gano getabiddwako ba minister ba Buganda abenjawulo, nga bakulembeddwamu minister w’ebyenjigiriza Owek. Cotilda Nakate Kikomeko.
