Obwakabaka bwa Buganda busse omukago n’Ekitongole ky’Amawanga amagatte ekirafuubanira eddembe ly’Abaana ki UNICEF, okutema empenda ezigenderera okwongera okutumbula ddembe ly’Abaana.
Mu nkolagana eno, Abaana mu Buganda abasoba mu bukadde 4 bebagenda okulondoolwa, nga wagenda kubaawo okulondoola ensoma yaabwe, endya gyebalyamu ng’ewa essuubi, n’Eddembe lyabwe ng’abaana.
Bwabadde asisinkanye abakungu mu UNICEF abakulembeddwamu Dr.Robin Nandy, Katikkiro wa Buganda Charles Peter Mayiga agambye nti okuwa abaana ebyenjigiriza ebyomuzinzi kkubo ttuufu eryokubategekera ebiseera ebitangaavu nga bakuze, n’Okutumbula ebyobulamu ebirungi.
Katikkiro ategeezezza nti mu nkolagana eno ne UNICEF, Obwakabaka bugenda kwongera amaanyi mu byobulamu by’Abaana, Eddembe lyabwe n’Obulamu, neyeebaza UNICEF olwokutakabanira eddembe ly’Abaana mu nsi yonna.
Minister wa Kabaka ow’Ebyenjigiriza , Ebyobulamu , Embeera z’Abantu era nga yavunaanyizibwa ku wofiisi ya Nnaabagereka Owek Nakate Chotilda Kikomeko, agambye nti ensonga z’Abaana mu Bwakabaka zigenda kwongerwaamu amaanyi okusinga bwegubadde.
Dr Robin Nandy akulira UNICEF mu Uganda ategeezezza nti Obwakabaka kyaakulabirako nnyo mu kuzza essuubi n’Obuntu mu bantu, enkuza y’Abaana ennungi n’ensonga endala, nasuubiza nti enkolagana eno n’Obwakabaka yakuvaamu ebibala bingi.#
