Banna Kalangala naddala abawangaalira mu bizinga by’e Kyamuswa bafunye ekyombo ekirala ekigenda okubasaabazanga kibawonye amaato g’embaawo agabadde gayitiridde okubadima mu nnyanja.
Ekyombo kino, MV ORMISTON Water Bus kyabasakiddwa omubaka w’e Kyamuswa Moses Kabuusu.
Ekyombo kino kimaze okulambuzibwa ku myalo egyenjawulo gyekinaayita okuli; Kacanga, Kkaaya, Misonzi, Bbosa ne Bbanda ebisangibwa mu ggombolola y’e Bufumira ne Lwanabatya ogusangibwa e Kyamuswa saako Buyange, Lwaazi – Bubeke ne Jaana egyisangibwa mu ggombolola y’e Bubeke.
Omubaka Moses Kabuusu agamba nti bino by’ebimu ku byamutumibwa abalunnyanja okukolako naddala okubaanguyizaako entambula.
Kabuusu agamba nti eby’entambula nga biwedde agenda kuddako masannyalaze ebizinga bitandike okwaka.
Ebyombo ekika nga kino bigoba ku ntindo kyokka zayonooneka nga wano ategezezza nti bayogedde n’e Minister w’ebyentambula n’enguudo era nabasuubiza okuzikolako.
Wabula enkola ya MV ORMISTON yanjawulo kubanga egobera ddala ku lubalama olwo nebasaawo olubaati lwayo okuyitira abasabaaze nga balinnya.
Ekyombo kino kitikka abasaabaze 180, n’ebyamaguzi ebiweza tani ttaano.
Abasubuzi ba mukene n’ebyennyanja ebirala bebasinze okusagambiza nti kubanga babadde bafiirwa nnyo ng’enkuba ebasanze ku mazzi.
Ekyombo kino kati kirindiridde ministry y’ebyentabula ekakase olugendo lwakyo, olwo kitandike okusaabaza banna Kalangala mu bizinga eby’enjawulo okutuuka e Kasenyi buli lunaku n’okubazzaayo.
Bisakiddwa: David Ssekayinga
