Ekibiina ekitaba abasawo mu ggwanga ekya Uganda Medical Association, (UMA), kitaddewo akakiiko akenjawulo okutegeka okulonda abakulembeze baakyo mu nnaku 21, oluvamnyuma lw’olukiiko mwebaabadde balina okubalondera okugwa obutaka.
Mu lukuηaana lw’abasawo olwawamu oluggalawo omwaka olwatudde e Mbarara ku wooteri ya Las Vegas, lwayabuse ng’abasawo naabeegwanyiza ebifo byobukulembeze bawanyisiganya bisongovu.
Entabwe esinze kuva ku kifo kyalina omukulembeze oba president w’ekibiina kino omuggya, oluvanyuma lwa Dr. Herbert Luswata, abaddeko okuwummula, n’okumalako ebisanjabye ebibiri.
Okusika omuguwa ku kifo ky’obwa president kubadde wakati wa Dr. Asiphas Owaraganise, ne Associate Prof Assimwe Frank, abeegwanyiza ekifo kino, era buli nkambi erumiriza jinaayo okwenyigira mu kubulankanya olukalala lw’abalonzi.
Mungeri yeemu wabaddewo okusika omuguwa wakati wa wofiisi ya ssabawandiisi w’ekibiina kino, ekulemberwa Dr Joel Mirembe Nsubuga ne wofiisi wa president avaako, ekulemberwa Dr Luswata Herbert, olwabuli luuyi okubaako gweruwagira owenjawulo.
Gyabyagweredde nga amaggye ne police biyituddwa okukkakkanya embeera eyabadde etandise okutabuka.
Cbs mukwogerako ne Dr Joel Mirembe Nsubuga, nga yaabadde ssaabawandiisi w’ekibiina era abadde avunanyizibwa ku kulondesa kuno, agambye nti okulonda kwasasise era kwayongezeddwayo okumala ennaku endala 21.
Waliwo akakiiko akaabaliko ba president b’ekibiina kino, akaweereddwa obuvunaanyizibwa okutegeka okulonda, oluvanyuma lw’olukiiko lwa NEC olubaddewo okusattululwa.
Dr Mirembe agambye nti obuzibu bwasinze kuva ku alijesita bbiri ezaaleteddwa nga kuteberezebwa okubaamu abalonzi abakyamu.
Wabula president w’ekibiina eyawummudde, Dr Hebert Luswata, mukwogerako ne CBS agambye tayagala kulaba kibiina nga kisasika era akakiiko akabakulembeze akatereddwawo akalinamu esuubi okutereeza embeera.
Bisakiddwa: Ddungu Davis
