President wa Uganda Yoweri Kaguta Museven akawangamudde nti Uganda terina ntegeka yakukendeeza ku misolo gyebimu ku bintu ebirinnye ennyo ebbeyi, ebikaluubirizza obulamu bwa bannauganda.
President Museveni mukwogerakwe eri eggwanga, agambye nti government ssinga ekendeeza ku misolo gy’ebintu ng’amafuta, sukaali, sabuuni, nebirala yakufiirwa emisolo ejisoba mu kitundu ky’akawumbi, nga kwotadde ne shilling ya Ugabda okwongera okunabuuka nnyo.
Amagezi president Museveni gawadde banna Uganda kwekwesonyiwa ebintu ebimu okutuusa ebbeeyi lwerikendeera naddala ebyo ebisobola okwewalibwa, ate ebirala ebyetaagisa ennyo mu bulamu obwa bulijjo babikekkereze.
Museveni mungeri yeemu alabudde banna Uganda abatafuddeyo kujjumbira kulya emmere ennansi gyagambye nti esobola okuyambako okutaakiriza ku mbeera eriwo, era naddamu okukaatiriza ekyokulya muwogo n’akalo, mu kifo ky’okulya omugaati ogulinnye ebbeyi.
Ku nsonga yaamafuta agatakolebwa wano, agambye nti banna Uganda balina okujjumbira enkola endala eziteetagisa mafuta naddala ng’okukozesa amasannyalaze g’amaanyi g’enjuba nebirala, okukendeeza ku nkozesa y’amafuta gagambye nti gonoona n’obutonde bwensi.
President Museveni agambye nti ebbeeyi y’ebintu eyekanamye esaasaanidde n’amawanga amalala nti yavudde ku luttalo lwa Russia ne Ukrain n’envumbo ezatekebwa ku ggwanga lya Russia naddala ku mafuta.
Agambye nti n’obulwadde bwa COVID19 bwaviirako agamu amakolero agaali gafulumya eby’amaguzi ebiwera okuggalawo
President Museveni agambye nti wadde ebbeeyi y’ebintu erinnye nyo mu kaseera kano, nti naye eby’enfuna by’eggwanga bikyali bulungiko okusinga amawanga amalala mangi.
