Abantu ba Ssaabasajja Kabaka ababeera mu bitundu by’Obukiika ddyo bwa africa bategese Ttabamiruka wabwe agenda okubeerawo nga 09 November,2024.
Ttabamiruka ono agenda kuyiindira mu Lagoon Beach mu Cape Town South Africa.
Katikkiro wa Buganda Charles Peter Mayiga y’agenda okuggulawo Ttabamiruka ono, era awerekeddwako minister wa government ez’ebitundu era nga yavunaanyizibwa ne nsonga z’abantu ba Kabaka ababeera ebweru wa Buganda Owek.Joseph Kawuki.
Ttabamiruka agendereddwamu okugatta abantu b’Omutanda ababeera mu bukiika ddyo bwa africa okuli South Africa, Zambia, Namibia, Mozambique, Botswana, Eswatini n’endala.
Katikkiro agambye nti enkola eno yakuyamba abantu ba Buganda okusigala nga bali bumu nebwebabeera ku mawanga, okubamanyisa ebifa eka baleme kwerabira gye bava, rta era bakolere wamu okwezimba.#
