Ssentebe wa district ye Wakiso asabye government okusaawo enkola ezinaayamba okuvaamu ensimbi ezisitula eby’obulamu bwa bannauganda, mu kifo ky’okulowooleza mu kuweebwa obuyambi okuva mu bazungu.
Bwanika agamba nti ekisinga okukwasa ennaku kwekuba nti n’obuyambi obubaweebwa babumalira mu kutegeka nkungaana mu wooteeri ez’amaanyi mu kulya ebicepere, nezitagasa bantu ba bulijjo.
Ssentebe Bwanika abadde ku kitebe kya district ku mukolo gw’okubakwasa Ambulance n’emmotoka omutambulizibwa eddagala erigema endwadde (Immunization van) egenda okutalaaga district nga etuusa obuweereza bw’eby’obulamu ku bantu.
Mulimu okugema abaana , okuyambako abakyala ab’embuto n’obujjanjabi ebwenjawulo ku bwereere.
Omukungu mu ministry y’ebyobulamu Charles Muhumuza omusomesa w’ebyobulamu ku nsonga z’okugema agamba nti ministry eno yakizuula nti olw’okuba abantu abasinga obungi mu bibuga bakeera kugenda kukola ate badda kiro, abazadde abamu balemererwa okufuna obudde obugenda ku malwaliro okugemesa abaana endwadde zinnamutta.
Emmotoka zino zigenda kiyambako okutuuka mu bitundu n’eddagala nga bwebagema abaana.
Amyuka akulira eby’obulamu mu Wakiso Dr. sister Betty Nabuganda agamba nti emmotoka zino zebafunye zigenda kubeera nga zirabirirwa ministry yeby’obulamu, era obuwereza bwonna bujjakubeera bwabwereere .
Bisakiddwa: Tonny Ngabo
