Kitongole ekivunanyizibwa ku nguudo mu ggwanga ekya UNRA kiyimirizza mbagirawo emmotoka ennene n’ezeetikka ebintu ebizito ezibadde zikozesa olutindo lwe Kaluma obutaddamu kulukozesa, olw’embeera yalwo efuuse ey’obulabe.
Ekiragiro kino kitandika okukola mu monday nga 6 May, 2024 okumala ebbanga lya myezi 3 nga luddaabirizibwa.
Emmotoka ezigaaniddwa okuyitako kuliko lukululana, loole ne Bus n’enmotoka endala ezisaabaza abantu abasukka 28.
Olutindo luno olwe Kaluma lusinga kuyisa mmotoka eziva e Kampala okudda e Gulu.
Abagoba b’ebidduka baweereddwa amagezi okukozesa olwe Luweero-Kafu-Masindi bagwe e Pakwach oba e Gulu
Omwogezi w’ekitongole kye nguudo mu ggwanga Allan Ssempebwa agambye nti abakugu balukebedde nga lutandise okutendewalirwa, nga n’olwekyo bayimirizza emmotoka ennene lusobole okuddaabirizibwa nga telunaleeta bulabe.#
