Ekitongole kya Uganda ekivunaanyizibwa ku by’enguudo ki Uganda National Roads Authority (UNRA), kikyaalemedde ebyapa byettaka ebisoba mu 6000 bannansi byebaawa ekitongole kino okusalako ebitundu ekitongole byekyaagula okuyisaako enguudo ezitali zimu.
Bino bifulumidde mu alipoota y’akakiiko ka parliament akalondoola entambuza y’emirimu mu bitongole bya government aka COSASE, akakulemberwa omubaka wa Busiro East Owek Medard Lubega Ssegona, eyanjuddwa mu parliament.
Alipoota eno eraze nti November w’omwaka 2023, weyatuukira UNRA yalina ebyapa byabannansi 8,101 ,wabula ekitongole ki UNRA nekizaayo ebyapa 1428 byokka.
Ebyapa 6678 UNRA ekyabiremedde nti ministry y’ebyettaka tenamaliriza nteekateeka yakusalako ebitundu ,ekitongole ki UNRA byekyagula okuyisaako enguudo.
Akakiiko ka COSASE kano, kalabudde nti UNRA okulemera ebyapa byabannansi, kibalemeseza okukulakulanya ettaka lyabwe okulifunamu kubanga ebyapa tebabirina.
Districts okuli Mukono, Kampala ,Wakiso, Mpigi nebitundu ebirala mu Buganda, akakiiko kazudde nti UNRA gyesiinga okubeera n’ebyapa.
Ku luguudo wa Northern By pass, ku byaapa 805 UNRA byeyatwala, yazaayo ebyapa 87 byokka.
Alipoota eno, eejjidde mu kiseera nga government kyejje esalewo nti ekitongole ki UNRA kigibwewo emirimu gyakyo gizzibwe mu ministry y’eby’enguudo.
Ebbago ly’okugyawo ekitongole ki UNRA, likyali mu parliament.