Akakiiko ķ’eggwanga akalezi k’eddembe ly`obuntu aka Uganda Human Rights Commission, kasabye ebitongole ebikuuma ddembe omuli police n’amagye okwanguwako okusattulula obubinja bw’abavubuka obutambula nebannabyabufuzi obumanyiddwa ennyo ng’eggaali, “Foot Soldiers” n’abalala, nti kubanga tebuliiwo mu mateeka era buyinza okuvaako okutabangula emirembe mu ggwanga.
Ssentebe wa Uganda Human Rights Commission Mariam Wangadya agambye nti obubinja buno bulabiddwako emirundi mungi nga bukola efujjo n`okusosonkereza abeby`okwerinda.
Mariam Wangadya abyogeredde ku Sheraton Hotel Kampala, mu lukuηηaana olwetabiddwamu ebitongole bya government ebyenjawulo, okuli akakiiko akalezi k’edembe ly`obuntu, akakiiko keby`okulonda, police, Uganda Communications Commission, nebitongole ebyenjawulo ebirwanirira edembe ly`obuntu, okubaganya ebirowoozo ku ngeri Uganda gyesobola okubeeramu nakalulu ka 2026 ak’amazina n`Obwenkanya.
Julius Muchunguzi omwogezi w’akakiiko kebyokulonda mu ggwanga nga yakiikiridde ssentebe wakakiiko kano Omulamuzi Simon Mugenyi Byabakama, asabye banabyabufuuzi abesimbyewo nti kano kekadde okulaga obuvunaanyizibwa mu by`obukulembeze, nga batambulira ku mateeka agabalambiika.
Dinah Kyasiimire commissioner okuva mu police nga yakiikiridde Ssaabadduumizi wa Police ye ggwanga Abas Byakagaba, agugumbudde banabyabufuzi abava ku nambiika entongole gyebalina okugoberera nga banoonya akalulu, wabula ate era nanenya nabakuuma ddembe abakwata embeera etabuse mu ngeri etali ya kikugu.
Dr.Abdul Salaamu Waiswa nga yakiikiridde Ssenkulu wa Uganda Communications Commission UCC, awabudde bannamawulire nemikutu gyamawuliire okwewala kyekubiira mu kiseera kino eky`okunoonya akalulu, nga bewala amawulire agasasamaza agayiinza okuvaako okutabangula akalulu n’eggwanga okutwaliza awamu.
Bisakiddwa: Musisi John
