Abazannyi b’omuzannyo gwa Chess 2 okuli Nio Hailey Mitchell ne Akot Emmanuella, bebagenze okukiikirira Uganda mu mpaka z’ensi yonna ez’amasomero eza World Schools Chess Championships ez’omwaka guno 2023.
Empaka zino zigenda kubeerawo okuva nga 13 okutuuka nga 23 omwezi guno April e Greece, era zigenda kwetabwamu abazannyi okuva mu mawanga 20.
Abazannyi abagenda okukiikirira Uganda mu mpaka zino bombi bayizi ku ssomero lya St Andrews Kaggwa Gombe High School era basiibuddwa olwaleero okwolekera Greece.
Omutandisi w’essomero lya St Andrews Kaggwa Gombe High School, Owek David Kiwalabye Male, bwabadde akulembedde omukolo gw’okusiibula abazannyi bano, abasabye okukola ennyo okusitula ekitiibwa ky’essomero lino ne Uganda okutwaliza ewamu.
Kiwalabye Male era akinogaanyizza nti ng’ayita mu ssomero lino agenda kubeera musaale mu kusitula ebitone by’abayizi mu mizannyo egyenjawulo.
St.Andrews Kaggwa Gombe High School omwaka oguwedde 2022 lyatuuka ku luzannya olwakamalirizo mu mpaka za masomero ga senior ez’omupiira ogw’ebigere eza National Championships ezaali mu Arua, ate ne bakiikirira ne Uganda mu mpaka za masomero aza East Africa.
Bisakiddwa: Issah Kimbugwe
