Ttiimu y’eggwanga ey’omupiira ogw’ebigere eyabazannyi abatasussa myaka 17 eya Uganda Cubs egudde maliri ne Venezuela goolo 1-1, mu mupiira ogw’okwegezamu nga yetegekera empaka z’ensi yonna eza FIFA U17 World Cup ez’omwaka guno 2025.
Omupiira guno Uganda Cubs eguzanyidde Dubai gye yakubye enkambi okumala ennaku 10 okwetegekera obulungi empaka za FIFA U17 World Cup.
Goolo ya Uganda eteebeddwa James Bogere, nga kati Uganda Cubs egenda kuzannya emipiira emirala 2 egy’okwegezamu okuli okuzannya ne Panama nga 26 October, ne Paraguay nga 28.
Oluvanyuma Uganda ejja kwolekera ekibuga Doha ekya Qatar okuvuganya mu World Cup agenda okuberawo okuva nga 03 okutuuka nga 27 November,2025.
Uganda eri mu kibinja K ne Chile, France ne Canada, era yakuzannya omupiira ogusooka nga ettunka ne ne Canada nga 05 November.
Uganda Cubs ye ttiimu ya Uganda ey’omupiira ogw’ebigere egenda okusookera ddala okuvuganya mu mpaka za World Cup.
Bisakiddwa: Isah Kimbugwe
