Ttiimu y’eggwanga ey’omupiira ogw’ebigere eya Uganda Cranes ewanduse mu mpaka za Africa eza Africa Cup of Nations 2025 eziyindira e Morocco, ekubiddwa Nigeria goolo 3-1.
Omupiira guno Uganda Cranes egumazeko nabazannyi 10 oluvanyuma lw’omukwasi wa goolo Salim Jamal Magoola okufuna kaadi emyufu mu dakiika 56 olw’okukwatira omupiira wabweru w’entabwe.
Wabula omukwasi wa goolo Dennis Masinde Onyango yeyasoose okulwala mu mupiira guno, era takomyewo mu kitundu eky’okubiri.
Salim Jamal olufunye kaadi emyufu, Uganda Cranes neeyingiza omukwasi wa goolo omulala Alionzi Nafian.
Goolo ya Uganda yokka mu muzannyo guno eteebeddwa Rogers Mato mu dakiika eye 75, nga Nigeria omupiira guno egwefuze ebitundu 71% ate Uganda ebitundu 21%.
Nigeria ekubye ebizungirizi ku goolo ya Uganda 17, nga 6 bye bibadde kuntomo.
Ate Uganda Cranes ekubye ebizungirizi ku goolo ya Nigeria 5, kimu kye kibadde kuntomo.
Uganda Cranes ewanduse mu mpaka zino ng’efunyeyo akabonero kamu kokka kye yafuna oluvanyuma lw’okugwa amaliri ne Tanzania goolo 1-1, nga Uganda yasooka kukubwa Tunisia goolo 3-1.
Nigeria eyiseewo ng’ekulembedde ekibinja C n’obubonero 09, Tunisia nayo eyiseewo mu kifo eky’okubiri n’obubonero 04, ate Tanzania ekutte kyakusatu n’obubonero 2.
Abazannyi ba Uganda Cranes okuli Ivan Ahimbisibwe, Reagan Mpande, Hilary Mukundane, Isaac Muleme, Ronald Ssekiganda ne Shafiq Kwikiriza Nana, tebakoonye ku mupiira okutuusa Uganda lwewanduse.
Bisakiddwa: Isah Kimbugwe
