Tiimu ya Uganda ey’omupiira ogw’ebigere eya Uganda Cranes ekubye South Sudan goolo 2-1 e Juba, so nga ne ku butaka e Kampala, Uganda Cranes yagikuba 1 – 0.
Kati Uganda Cranes ekyakulembedde ekibinja K n’obubonero 10 okuva mu mipiira 4, South Africa esigadde yakubiri n’obubonero 8, Congo Brazzaville yakusatu n’obubonero 4 ate nga South Sudan esembye terinaayo kabonero konna.
Wabula wadde guli gutyo, Uganda tenakakasibwa kwetaba mu mpaka za Africa Cup of Nations ez’omwaka ogujja 2025 zinaabeera e Morocco, oluvanyuma lwa Congo Brazzaville ne South Africa bwe bali mu kibinja kye kimu okugwa amaliri ga goolo 1-1 mu Brazzaville.
Ekya South Africa okulemererwa okuwangula Congo Brazzaville, olwo Uganda Cranes ebeera tenakakasibwa kukiika mu mpaka ezakamalirizo.
Embeera eno eviiriddeko bannauganda okusigala nga bikyabasobedde, kubanga Uganda Cranes teyakiika mu mpaka za Africa Cup ez’emirundi 2 egisembyeyo okuli eza 2021 e Cameroon ne 2023 mu Ivory Coast.
Uganda Cranes yakiika mu mpaka za AFCON 2019 e Misiri, ne mu 2017 e Gabon, oluvanyuma lw’ebbanga lya myaka 38 nga tekiika yali yakoma mu 1978.#
Bisakiddwa: Isah Kimbugwe
Uganda Cranes ejja kudda mu kisaawe nga 11 omwezi ogujja ogwe 11 okuzannya ne South Africa mu kisaawe e Namboole.
Amawanga agakayitamu okugenda e Morocco kuliko Senegal, Misiri, Algeria, Angola, DR Congo, Cameroon, Burkina Faso n’abategesi aba Morocco.
Empaka za Africa Cup of Nations e Morocco, zigenda kuberawo okuva nga 21 omwezi ogwa December 2025 okutuuka nga 18 January 2026.
xxxxxxxxxxIsahxxxxxxxx